Komunidade suku Komoro, “ezíje” ba governu liu-liu ministériu relevante hanesan Ministériu Administrasaun Estatál (MAE), no Ministériu Solidariedade Sosiál no Inkluzaun (MSSI), atu halo klarifikasaun kona-ba lista hirak ne'ebé lakon, tanba ministériu rua ne'e maka responsável másimu ba asuntu ne’e.
“Hodi Komoro nia naran tomak husu ba governu liu-liu iha MSSI, ami aldeia 14 suku Komoro nian husu klarifikasaun ba naran totál reklamantes 1.200, ne'ebé oras ne'e hein hela prosesu pagamentu $200”, Xefi Suku Komoro, Eurico da Cruz hateten liuhusi komferénsia imprénsa ne'ebé realiza iha sede suku Komoro, Kuarta (25/11).
Dala-ida tan, nia dehan, totál lista reklamasaun ne'ebé hato'o husi komunidade hamutuk ema na’in 1.288, maibé to'o iha faze pagamentu, ema na’in 88 de'it mak naran iha no na’in 1.200 seluk naran laiha lista no lakon.
Antes ne’e, nia hatutan, governu rasik promete ona ba povu katak sei prosesa dadus reklamante sira ne'e ba loron 15 de'it, maibé realidade to’o ona fulan tolu mak foin halo pagamentu depois halo komunidade barak mak sira nia naran lakon no bainhira loos mak halo fila-fali pagamentu foun.
“Realizasaun ne'e mak bainhira loos, ne'e mak ami atu husu lori povu nia naran, bainhira loos, governu hateten dehan segunda faze, bainhira loos”, nia kestiona.
Nia esplika, husi reklamasaun sira ne'e, iha mós naran reklamantes verbal balun ne'ebé ba ko’alia direta iha MSSI ne'ebé maioria sira nia saláriu liu $500 amerikanu ba leten.
“Totál suku Komoro nian hamutuk 88, ninia prosesu pagamentu en-kursu, katak agora pagamentu ba en-kursu ne'e ba sira atu hala’o iha loron 25 dezembru to'o remata. Ne'e katak, ami konsellu suku ne'e tenke kumpri programa governu nian”, nia dehan.
Nia mós husu ba populasaun sira atu iha kompreensaun mútua entre sira hotu-hotu, tanba la’ós autoridade lokál mak taka dalan, maibé hotu-hotu bele hamutuk ba husu iha sosial tanba sá mak halo pagamentu tarde.
“La'ós dehan osan iha ne'e ona, osan iha ne'e ba 88 pesoas ne'ebé mai husi governu”, nia hateten.
Eurico promete sei hamutuk ho xefi aldeia na'in 14 ho komunidade tomak haruka karta ba Parlamentu Nasionál (PN), Prímeiru Ministru (PM), ba ministériu kompetente atu haree rezolve problema ne'ebé mosu ba nia komuniade.
“Lísta ida ne'e sei ba to'o iha sira, ami sei halo ACC ba sira, laiha manipulasaun husi suku, katak osan fó mai tiha iha suku mak ami la fó ami nia povu ne'e, laiha”, nia esklarese.
Nia esplika, tuir lei konsellu suku ka lei lideransa komunitáriu nú. 9/2016, xefi suku sira la obriga governu ba prosesu pagamentu, maibé nia sei nafatin hamutuk ho povu hodi husu klarifikasaun ba prosesu administrasaun no nia konteudu la tuir sistema birokrasia.
Tuir observasaun www.tempotimor.com iha terrenu nota katak, komunidade mós halo protestu liuhusi diskute malu ho xefi suku ho nia xefi aldeia sira kona-ba lista reklamante ne'ebé laiha tanba konsidera konsellu suku laiha responsábilidade. (*)
