Nia dehan, bainhira iha prosedur ne’e maka, iha indisius ruma ne’ebé mosu diskriminasaun, Rede Feto sei hato’o ninia pozisaun.
"Sé karik iha prosesu sira ne'e mosu diskriminasaun ba inan-feton sira, ita sei haree hamutuk kestaun ida ne'e", Yasinta Luzinha hateten lia hirak ne’e hafoin partisipa Long March iha Tasi-tolu, Dili, Kuarta (25/11).
Nia rekoñese katak, instituisaun idaidak iha ninia desizaun tuir nia kompeténsia rasik, maibé Rede Feto mós iha ninia papél atu haree kona-ba labele iha diskriminasaun ba nia feto maluk sira.
"Sei haree ba kestaun prosedural ka mekanizmu balun, karik hamosu diskriminasaun, ou la tuir prosesu legál ne'ebé iha, entaun depois Rede Feto sei fó nia pontu de vista", nia promete.
Nia mós promete, sei luta maka'as ba hasa'e feto timoroan sira nia partisipasaun iha vida polítika, tanba lei permite feto bele partisipa iha kualker prosesu, liu-liu ba dezenvolvimentu nasionál.
Deklarasaun ne'e nia hato'o, relasiona ho desizaun Prezidente Parlamentu Nasionál (PPN), Aniceto Mouzinho Guterres ne'ebé deside ezonera Sekretária Parlamentu Nasionál, Cedeliza Faria dos Santos husi nia kargu iha Tersa (24/11). (*)