Ironia tebes, institusaun reguladór Autoridade Nasional Komunikasaun (ANC-Sigla Portuges) iha MTK nia mahon, maibe José Agostinho da Silva hateten nian parte lakohi atu komenta uluk antes ministeiru prezidensia konsellu ministru fó sai tanba regras, no lakohi hakat liu kompeténsia husi Ministru Fidélis Mangalhaes.
"Depois ha’u fó sai, ha’u labele hakat liu fali Prezidenti konsellu ministru tanba ida ne'e regras," José hateten ba jornalista iha Palásiu Governu Dili, Kuarta (25/11).
Governante ne'e hili dalan lakohi komenta no hatan perguntas husi jornalista sira, maski jornalista sira rasik uza maneira oi-oin liu husi perguntas ligadu ho kazu internet ilegál.
Tuir José, iha reuniaun konsellu ministru ko’alia ona kazu refere no nia parte husu jornalista sira hein rezultadu konsellu ministru, tanba konsidera informasaun tomak inklui kazu internet ilegál sei transmite husi Ministru prezidensia konsellu ministru, Fidélis Mangalhaes.
"Orsida informasaun Prezidenti konsellu ministru sei fo sai tiha depois ha’u divulga, ha’u disponível kualkér momentu atu fo sai informasaun," José promete.
Maibe, bainhira ministru prezidensia konsellu ministru, Fidélis Mangalhaes fo sai rezultadu KM ohin, www.tempotimor.com nota katak laiha informasaun ruma ne'ebé ko’alia iha konsellu ministru ligadu ho kazu Internet ilegál.
Antes ne'e, kazu Internet ilegal rasik nakloke ba publiku bainhira PNTL-SIK halo buska ba operador Telemor ne'ebé lokaliza iha Timor plaza no kompana elite komputer ne'ebé lokaliza iha Kolmera durante ne'e fornese internet ba ministeiru sira.(*)