Deputadu bankada CNRT Ricardo Baptista ko’alia asuntu ne’e tanba nota katak, Osan milaun $17 ne'ebé eis Autoridade RAOEA Mari AIlkatiri selu ba Atlantic Eagle Ship building ne'e konsidera lakon saugati deit, tanba ferry haksolok to'o ohin loron nia paradeiru la klaru.
Nia hatutan, agora estadu tenke hasai tan povu nia osan hodi taka osan ne'ebé Mari Alkatiri ho nia belun sira fahe ba malu tiha ona.
"Eskándalu Ferry Haksolok ne'e hatudu momoos oinså estadu tomak monu tiha ba Mari Alkatiri nia mafia ho nia belun Estranjeiru Luis Pité hodi haknauk estadu nia osan. Osan milaun $17 ne'ebé Mari selu ba Atlantic Eagle Ship building ne'e lakon saugati deit," Ricardo Baptista hateten liu husi konferénsia imprensa iha PN, Kuarta (25/11).
Nia parte dúvida ho eskándalu Ferry Haksolok ne'ebé mak Fretilin tau iha kestaun no titulu "Bom Jestór" ne'ebé partidu tula ba Mari Alkatiri nia leten.
"Sera ké "Bom Jestór" ne'e maka signifika selu 100% ba sasán ne'ebé seidauk konklui nia konstrusaun? Ka "Bom Jestór" ne'e mak signifika fakar tiha povu nia osan millaun $17 ba Ferry Haksolok hafoin husu tan Estadu atu hasai tan osan atu selu ferry ne'ebé oras ne'e frujen hela iha tasi laran," nia dúvida.
Wainhira www.tempotimor.com koko konfirma ho eis Ulun Vo'ot ZEESM nian, Dr. Mari Alkatiri relasiona ho akuzasaun ne'e maibe numeru telefone 77230XXX disligadu. (*)
