Embaixadór ne'e mós dehan, la'ós ba demokrásia de'it, maibé TL presiza halo esplorasaun lalais ba petróleu, tanba tempu la'o ba daudaun ona.
"Ha'u mós ko'alia ba Prezidente Repúblika (PR) Francisco Guterres Lú Olo katak, ha'u fila ho konfiansa no optimista boot ba futuru TL, tanba ha'u sente katak TL iha ona dalan ne'ebé di'ak. TL konsege halo ona konsolidasaun ba demokrásia," Embaixadór Aldemo hateten lia hirak ne’e hafoin kumprimenta PR Lú Olo tanba mandatu hotu ona iha TL, Kuarta (25/11).
Nia akresenta, TL halo konsolidasaun ba demokrásia liuhusi eleisaun no transferénsia podér husi polítiku ida ba polítiku seluk, laiha perturbasaun no laiha problema ne’ebé boot.
"Demokrásia liuhusi eleisaun Parlamentár no Prezidensiál ho susesu ne'ebé reforsa liután demokrásia no TL halo eleisaun ne'ebé justu no trasparansia. Ida ne’e koñesidu hanesan nasaun demokrátiku liu iha sudeste aziátiku, depois mós iha transferénsia podér husi grupu polítiku ida ba grupu polítiku seluk ne'ebé ho forma pasífika no maturál, entaun sente Importante tebes," Aldemo dehan.
Embaixadór ne'e mós optimista boot ba futuru TL nian liu-liu petroleu no gas ne'ebé koñesidu ho Greater Sunrise.
"Ha'u-nia observasaun katak, petroleu ne'e, kualker forma ba esplorasaun no lori pipeline mai TL ka transfere ba darwin, ha'u hanoin desizaun saida de'it mak governu TL iha ba esplorasaun GS ne'e tenke feitu no rápidu, labele hein ba tempu naruk," nia sujere.
Embaixadór akresenta, tempu la ba daudaun ona, tanba ne'e TL tenke esplora lalais ho posível rezerva boot petroleu ida ne'e.(*)