Ministru ba Asuntus Parlamentares no Komunikasaun Sosiál (MAPKOMS), Francisco Martins da Costa Pereira Jerónimo, hato’o deklarasaun ne’e uainhira hala’o diálogu komunitáriu ho autoridade lokál no populasaun iha suku Dato-tolu, postu administrativu Fohorem, munisípiu Covalima, kinta-feira, loron 26 fulan-novembru tinan 2020.
Komunikadu ne’ebé www.tempotimor.com asesu hateten, prezensa ministru Asuntus Parlametaes no komunikasaun Sosiál Francisco Martins da Costa Pereira komitiva simu diretamente husi Administradór Postu Administrativu Covalima no ekipa hodi tara tais no lok bua malus, aompnha mos ho dansa kultura Munisipiu Covalima nian, nudár jestu konsiderasaun ba prezensa MAPKOMS ho Komitiva iha Postu Administrativu Munisipiu Covalima.
Lider másimu MAPKOMS hateten, iha tinan 2021 Governu sei fó liu prioridade ba setór sosiál, agrikultura, ekonomia no setór infraestrutura tanba setór sosiál ne’ebé inklui saúde no edukasaun importante, maibé seidauk alkansa ninia meta tanba durante ne’e ladún sai prioridade.
Atu lori informasaun sira kona-ba dezenvolvimentu iha rai laran, maka governu liuhosi MAPKOMS iha polítika hakarak lori informasaun no komunikasaun to’o iha área rurál la’ós de’it iha kapitál liuhosi implementasaun programa Naroman ba Suku nune’e komunidade bele akompaña lala’ok servisu órgaun ezekutivu nian.
Ministru ba Asuntus Parlamentares no Komunikasaun Sosiál reforsa MAPKOMS iha papél atu promove área komunikasaun sosiál liuliu kona-ba oinsá divulga informasaun sira husi nivel nasionál no internasionál bele to’o mós iha baze atu nune’e povu bele hetan informasaun ne’ebé loos hodi kontribui ba dezenvolvimentu nasionál.
Programa Naroman ba Suku fó benefísiu ba povu liuliu ba joven sira liuhosi kapasitasaun iha área jornalizmu nune’e bele kobre potensialidade ne’ebé suku iha hanesan agrikultura, turizmu no rekursu importante seluk tan nune’e públiku bele hatene.
MAPKOMS hateten uainhira iha diálogu komunitáriu ne’e, populasaun sira aseita ho programa Naroman ba Suku, maka iha tinan 2021 ninia parte sei prepara kondisaun liuliu ekipamentu ne’ebé liga ho servisu mídia hodi apoia joven sira atu aumenta koñesimentu iha área jornalizmu hodi promove potensialidade suku nian liuhosi meiu komunikasaun sosiál.
Iha diálogu komunitáriu ne’e, MAPKOMS mós ko’alia kona-ba posibilidade atu harii torre iha munisípiu Covalima hodi dijitaliza Rádiu no Televizaun Timor-Leste, tanba mundu oras ne’e la’ós ona iha era manuál maibé opta ona sistema dijitál.
Partisipa iha Diálogu ne’e husi Autoridade ne’ebé mak kompostu husi, Administradór Munisipiu Covalima, Veteranu, komandante Polisia PNTL Munisipiu Covalima comandante UPF, no komunidade sira husi suku refere. (*)
PUBLISIDADE
