Diretór Bombeirus Claudio da Silva informa, durante hala'o servisu iha terrenu enfrenta situasaun oi-oin, maibé kontinua servisu, no la eziji.
"Bombeirus ne'e la presiza uma luxu mak ami hala'o servisu, maski kahe lona de'it mós prontu servisu, ne'ebé ida ne'e mak ami infrenta", hafoin partisipa iha Workshop ida iha Fatuhada, Segunda (30/11).
Nia subliña katak, difikuldade ne'ebé hasoru ne'e, liuliu iha terrenu hanesan konstrusaun uma sira seidauk tau prioridade no sistema seguransa nian.
Nia mos afirma, baihira iha terrenu mosu situasaun emerjensia ruma meius komunikasaun atu kontaktu lalais ba bombeirus mak laiha.
"Entaun informasaun ne'ebé Ita simu atrazu, ida ne'e mak sempre hasoru", nia tenik.
Nune'e, maneira servisu ne'ebe durante bombeirus halo mak sensibilizasaun fo informasaun.
"Fó ita nia númeru kontaktu ba iha media sira atu fahe tutan ba komunidade par bainhira mosu insidentes ruma sira bele informa lalais ba kuartel bombeirus sira ne'ebe besik", nia esplika.
Tanba ne'e, tuir planu sei tau prioridade ba hari kuartél bombeirus nian iha munisipiu sira atu asegura lalais insidente iha situasaun emerjénsia. (*)
Publisidade