Login to your account

Username *
Password *
Remember Me

L7 Fó Ultimatu, CNRT Labele Repete Liafuan Governu TMR “Defaktu”

Deputadu Partidu Libertasaun Popular (PLP) Cornélio Gama "L7" Deputadu Partidu Libertasaun Popular (PLP) Cornélio Gama "L7" Foto Suplai

Tempotimor (Dili)- Veteranu no atuál Deputadu Partidu Libertasaun Popular (PLP) Cornélio Gama "L7" fó ultimatu ba bankada deputadu sira husi bankada opozisaun CNRT, atu labele repete tan liafuan governu Taur Matan Ruak “defaktu” iha plenária.

Deputadu L7 fó ultimatu ne’e iha plenária PN, Kuarta (2/12), hafoin deputada CNRT Veneranda Lemos hateten katak, governu Taur Matan Ruak nian ne'e defaktu ka ilegál.

"Liafuan defaktu ne'e povu rona hotu ona, katak, primeiru rejiaun to'o kuartu rejiaun ne'e defaktu hotu, otonomi mós defaktu, frente diplomátika mós defaktu. Liafuan ida ne'e aban ha'u lakohi rona tan. Se aban ha'u rona tan, ne'e disfama," Deputadu L7 fó ultimatu.

Nia mós husu ba bankada CNRT atu deklara kona-ba governu dahuluk to'o agora ne'e ida ne'ebé mak di'ak ona.

"Husi governu dahuluk to'o governu daualu ne'e ida ne'ebé mak loos ona? Ne'ebé ko'alia defaktu ne'e podia dehan tribunál rekursu mak defaktu, agora imi ko'alia ne'e hatún ami-nia dignidade," L7 ko’alia ho emosaun.

L7 konsidera deklarasaun ne'e hatún sira-nia dignidade, tanba Taur Matan Ruak ne'ebé tuur hanesan Primeriu Ministru (PM) mak uluk lidera iha ai-laran.

"Imi hatún ami katak ami beik-ten, ne'e ami la konkorda, podia respeita, ita dehan hanesan ne'e PM jere osan la loos, mais defaktu, ita boot sira ko'alia ba PM Taur ne'e ami mós la fó ulun, ko'alia aat ami-nia boot, ami moe liu," L7 dehan.

Hatán ba deklarasaun deputadu L7 nian ne'e, vise xefe bankada CNRT deputadu Patrocino dos Reis katak, CNRT la merese hetan ameasa iha PN.

"Ami iha ne'e la ko'alia vokabuláriu foun, maibé ami ko'alia tuir de'it liafuan ne'ebé ami aprende husi meste sira kona-ba defaktu no viabilizadu, nune'e duni ami la merese hetan fali ameasa ida ne'e iha uma fukun ida ne'e," Patrocino dehan.

Entretantu, molok ne'e deputada Veneranda Lemos hateten katak, governu defaktu ne'ebé lidera husi PM Taur Matan Ruak tenke tau atensaun ba membru sira.

"Husu ba PM Taur Matan Ruak nia governu defaktu ne'e atu tau atensaun ba ita-boot nia membru governu defaktu, ne'ebé lori lia-bosok ba ita-boot katak buat hotu loos, mais finalmente laiha buat ida ne'ebé loos," Veneranda hateten.(*)

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« March 2024 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter