Traballadór ho naran bolu “Ameta” ne’ebé www.tempotimor.com kontaktu liuhusi telefónika ho númeru 7746** no lakohi públika nia identidade loloos hateten, nia tuir ona kursu Seasonál Workers Program (SWP) ne'e iha tinan 2019, no teste médiku remata iha Outubru 2019.

“Ha’u kompleta formasaun no pasa ona dokumentu hotu kona-ba asuntu saúde inklui teste sputum nian iha 2019. Tanba momentu atu tama ba 2020 iha ona surtu corona virus, entaun parte SEFOPE dehan, hein de'it kontaktu no ha’u hetan duni kontaktu iha 18 Novembru 2020”, nia konta tuir.

Iha kontaktu ne’e, parte SEFOPE husu Ameta atu bele lori nia pasaporte hodi scan, tanba naran selesionadu duni ba SWP hodi ba servisu iha Austrália.

“Entaun ha'u lori ha'u nia pasaporte ba, depois sira esplika katak, imi sira ne'ebé uluk halo teste sputum ne'e la presiza halo ona, tanba imi nia rezultadu ne'e sei válida, ami haree no verfika hotu ona", Ameta konta tuir.

Husi ne’e Ameta mós garantia, no nia hamutuk ho nia kolega sira seluk ba tuir prosesu PDB, hodi hatama dokumentus hanesan rejistu kriminál no seluk tan.

"Iha dia 1 dezembru kalan, data ikus, ne'ebé sira kontaktu ha'u, husu hodi ha'u lori ha'u nia inan-aman ba asina deklarasaun, atu nune'e dia 2 dezembru tuku 6 madrugada bele arranka ona ba Austrália. Entaun ha'u ho hau-nia inan-aman ba asina tiha deklarasaun ne'e, hotu ami mai fali uma, agora to'o tiha iha uma mak sira telefoni fali ha'u katak, tenke lori fali deklarasau ohin asina ne'e ba fotokopia rua hodi fó orijinál ba SEFOPE, ha'u

kaer fotokopia ida lori ba Austrália no inan-aman kaer fotokopia tahan ida. Ha'u halo tuir no lori tiha ba, depois ha'u fila mai tiha uma, depois sira telefoni fali ha'u katak, diretór atu enkontru ho imi na'in neen, ne'ebé ha'u ba fali, sira dehan katak, ita-boot nia Hp-ID ne'ebé mak ami manda ba imigrasaun Austrália ne'e mate ona”, nia haktuir.

Entaun Ameta husu hikas ba parte SEFOPE katak, nusa mak antes ne’e dehan verifika ona no laiha problema, derepente dehan fali buat ne’e mate.

“Razaun ba ha’u la klaru, runggu rangga loos, primeiru ko’alia buat seluk, derepente koa’lia fali buat seluk, ne’e halo ha’u mós bingun. Dala ida tan razaun ba ha’u la klaru liu”, nia protesta.

Ameta mós preokupa tanba antes ne’e nia ho nia kolega lubuk ida mak halo teste sputum hamutuk, maibé ninia kolega seluk nia hap-id la mate, no Ameta nian deit mak mate fali.

"Ha'u-nia kolega balun ne'ebé ba tiha ona ona, ne'e ami teste hanesan, maibé tanba saida mak sira-nia hap-id la hanesan fali ami nian, enkuantu sira SEFOPE dehan hau nian mesak mak mate no kolega sira seluk ne’e la mate no sira ba tiha ona”, Ameta kestiona.(*)