Prezeidente KFP ne’e hateten, loloos governu tenke fó importánsia mós ba loron ida ne'e, tanba husi loron ne'e mak Indonézia hahú invade Timor-Leste, entaun jerasaun foun sira ne'ebé sei kontinua lidera TL iha futuru presiza hatene.
"Ita sente triste, laran taridu, tanba parte kompetente sira husi estadu ida ne'e la fó atensaun boot ba loron boot 7 Dezembru, loron invazaun Indonézia ninian," Prezidente KFP hateten iha Palásiu Governu, Segunda (7/12).
Faustino dehan, loloos ne'e governu liuhusi ministériu relevante sira buka atu sensibiliza loron invazaun ida ne'e, liu-liu haree husi aspeitu timoroan reziste hasoru invazaun.
"Husi sensibilizasaun ita hametin kontinuidade memória ka istória ida ne'e ba ita-nia jerasaun sira iha tempu oin mai," nia subliña.
Nia mós dehan, kada tinan iha parte balun hanesan muzeu da rezisténsia, Centro Nasionál Chega (CNC) ninian mak halo komemorasaun, nune'e CNC nian.
"Parese ema oitoan de'it mak sei partisipa, maibé nasionalmente ita la sente komemorasaun loron 7 Dezembru ne'e," Faustino salienta.(*)