“Labele iha liberdade hodi riba tun vontade ema ida nian, bainhira ema ne’e hakarak, nia hatama, bainhira nia lakohi, entaun nia hasai. Tanba ne’e, Xanana rasik presiza hetan edukasaun sívika para labele repete tan,” Marí Alkatiri hato’o sujestaun ne’e bainhira sai oradór ba komemorasaun loron invazaun 7 dezembru, iha CCF Komoro, Segunda (7/12).
Sekretáriu Jerál Fretilin ne’e afirma, tenke hatene hakruuk ba realidade, tanba ne’e nia nai hateten ba ninia kolaboradór sira kona-ba labele iha vigansa ka perseguisaun.
“Ha’u lakohi vingansa ka perseguisaun, ódiu, maibé ita-nia funsaun hanesan lideransa atu eduka, ita tenke eduka husi leten mak ba to’o kraik no husi kraik ba leten, ne’e mak funsaun lideransa libertadór no lideransa fundadór no lideransa servidór,” nia alerta.
Tuir Marí Alkatiri katak, durante ne’e iha ema balun ne’ebé uza demokrásia hodi hafahe Timoroan sira.
“Balun sei uza demokrásia para atu fahe, la’ós fó liberdade ba ida-idak hodi hanoin no kontribui, tanba demokrásia ne’ebé Fretilin lori mai ne’e atu fó liberdade ba ema ida-idak hodi hanoin no kontribui, la’ós la hetan ona maioria ba haknauk husi ne’e, husi ne’ebá, hodi forma maioria ida ne’ebé falsa,” nia dehan.(*)