Nia dehan, orsamentu aloka ba embaixadór kada nasaun ho montante la hanesan.
"Orsamentu ba embaixadór barak loos, kada embaixada oin-seluk, ezemplu hanesan embaixada iha Indonézia, Amérika nia montante oin seluk, ha’u la dekór hotu kedas, maibé kada embaixada ne'e ita haruka ba depende ba kustu de vida rai nian", MNEK hateten lia hirak ne’e hafoin reuniaun Konsellu Ministru iha palasiu governu, Kuarta (16/12).
Nia fó ezemplu, hanesan embaixadór TL nian ba iha Japaun no Singapura karun liu, tanba estadu fó sira nia kustu vida barak liu, kompara ho rai seluk hanesan Tailándia ho Indonézia ne'ebé barratu.
"Orsamentu sira aloka ba ne'e atu selu funsionáriu lokál nia saláriu, ba diplomata nia moris lor-loron ne'e, tama ba alozamentu, bens servisu mak selu ba eletrisidade, aluga embaixada, selu bee, sosa suratahan no sosa sasan office nian atu sira halo servisu loro-loron", Ministra esplika.
Entretantu, Orsamentu Jerál Estadu (OJE) 2021 ba Ministériu Negósiu Estranjeiru no Kooperasaun (MNEK) hamutuk millaun $26.8. (*)