Xanana kestiona tanba, hanesan Prezidente partidu CNRT kompriende katak, iha termu jurídiku baibain uza termu aprezenta kazu ba Tribunál, la’ós kesar, tanba kesar ne’e linguajen labarik sira nian ne’ebé baibain uza iha momentu halimar no la merese atu Prezidente Republika Francisco Guterres Lú Olo uza liafuan ne’e iha situasaun sira ne’e.

Lider Nasional Xanana Gusmao kestiona PR Lú Olo nia kapasidade no lia fuan ne’e,  ho piadas, nia konsidera PR Lú Olo eskola boot no hasai espesialidade iha area direitu. 

"Hau rona katak, ema balun ko'alia iha Baukau dehan katak, CNRT kesar, kesar dala tolu. Ha’u mak estuda direitu karik, ha’u la dehan kesar, maibé ha’u dehan aprezenta kazu ne'e iha tribunal. Tanba Lia-fuan kesar ne'e, ita rakyat (povu) ne'e mak dehan kesar, mas ita kuandu estuda ona direitu, wisuda tiha ona ne'e ita la dehan katak, ou sira mak kesar, sira ba aprezenta kestaun ne'e iha tribunál, atu lakon ga la lakon, mas problema ne'e hanesan ne'e nafatin, ita hili dalan legál konstitusionál", Xanana hateten lia hirak ne’e hafoin selebra natal no tinan foun iha sede nasionál CNRT Bairro dos Grilos, Sesta (18/12). 

Lider karismátiku ne’e konsiente katak, rai ne’e iha krizi, maibé fiar katak, to'o tempu ho Maromak Nia tulun bele lori fali povu Timor-Leste ba dalan loos ne’ebé sira mós hein hela. 

Tanba ne’e líder Karismátiku ne'e sempre uza prinsípiu no valores domin, respeita ne’ebé hamahan ema hotu, tuir dalan legál konstituisaun sei to'o tempu atu lori povu ba dalan loos.

Xanana hateten, maski iha polítika ho ideia ne’ebé diferente, maibé hare ba problema iha rai laran laiha mudansa, entaun buka dalan legál hodi rezolve. 

Tanba ida ne'e mak, dalan diak no seguru liu atu hatudu ba povu rasik, liu-liu ba jerasaun foun katak, la’e, nunka uza violénsia mezmu problema ne'e boot. 

"Uza mak ulun, uza mak prinsipiu, uza mak valores domin no respeita malu, ne'e duni ita fiar katak, mosu krizi iha ita nia rain, ita iha tiha ona, agora ita tuir dalan legál konstitusionál,” Xanana esplika. 

Tanba ida ne'e, Xanana hatutan, atu ko'alia hanesan putar ba putar mai la diak, ko'alia atu loke hotu mós la diak, tanba hahan malirin tiha ona, nune'e fo de'it hanoin ba maluk sira tomak katak, importante mak husu nafatin ba Maromak atu ajuda hodi konsolida-an, husu mós ba matebian sira, ba rai lulik ida ne'e nia ajuda, hametin partidu atu iha hanoin ne’ebé luan, hanoin loloos, hadi'a an, prepara-an atu bele sai duni povu ninia instrumentu ida hodi defende no valoriza konstituisaun.

Iha Parte seluk, estudante UNTL ida ne’ebe husu www.tempotimor.com labele publika nia identidade kompletu no husu bolu de'it, bolu de'it naran G. Silva hato’o ninia preokupasaun kona ba lala’ok lider sira nian. 

Antes ne’e iha tinan 2017, Prezidente CNRT Xanana apoia Lú Olo bainhira kadidata-an ba Prezidente Repúblika, no konsege lori ba hatuur iha palasiu Aitarak Laran .

Iha momentu ne’eba Xanana halo kampaña katak, ninia alin Lú Olo iha kuinesimentu klean kona ba Konstituisaun no konsege remata nia estudu iha area direitu.

“Ohin loron Avo nana (Xanana Gusmao) komesa arrepende no komesa kestiona kualidade no kapasidade Senor Lú Olo  nu’udár Prezidente Repúblika,” dehan G. D. C. silva, estudante husi Fakuldade Direitu iha Universidade ida iha Dili. 

Maibe Wainhira PR Lú Olo rezeita fo pose ba membru VIII governu Konstitusional ne’ebe maioria kuadru Xave husi Partidu CNRT hakanek fali relasaun lider sira ne’e nian. 

Maske nune’e foin sa’e ne’e apeella ba unidade lider sira nian mezmu ida idak iha nia partidu rasik. 

“Bainbain lider sira apella atu povu hamutuk mas se sira rasik fahe malu oin sa maka sira nia apellu ne’e povu bele halo tuir,” nia kestiona. (*)