Iha semana kotuk, (14/12) reklamante hamutuk 1.400 husi suku Komoro deside tun diretamente hasoru malu ho komisaun F Parlamentu Nasional, hodi ejizi sira nia diretu $200.
Husi sorumutu ida ne'e deputadu sira mos halo kedan konfirmasaun ho parte Ministeriu Solidaridade Sosiál no Inkluzaun (MSSI) katak, sei hala'o pagamentu iha tempu badak, maibe realidade liafuan hirak ne'e hela deit ho buat mamuk ida.
Ho preokupasaun ne'e, deputadu bankada FRETILIN Dário Madeira husu ba Ministeriu Solidaridade Sosial no Inkluzaun (MSSI) atu buka solusaun ba reklamnate sira nia problema ne’e.
"Ha’u husu ba Ministériu Solidaridade Sosial ne'ebé trata asuntu ida ne'e atu buka solusun hodi hala'o pagamentu ba sira,"Dario hateten iha plenária PN, Segunda (21/12).
Molok ne'e, Portavos Simão Ximenes promete sei fila hikas ba PN bainhira laiha rezultadu nafatin.
Portavoz ne’e ko’alia tanba nia hare katak, bainhira sira mai hasoru malu ho membru PN, iha sorumutu ne’e rasik deputadu sira deside telefone direitamente ba parte Ministeriu Solidadridade Sosial, no sira mos responde katak semana ne'e nia laran sei hala'o Prosesu pagamentu subsidiu ba iha sira nia suku Komoro.
Fatin hanesan reklamante hosi Aldeia Moris Foun Suku Komoro, Marta Amaral de Jesus, hateten sira nia pozisaun mai tanba hakarak bolu nafatin atensaun ba governu atu rezolve lalais lista reklamante sira ne'ebé to'o ohin loron seidauk simu direitu subsidiu.
"Ohin ami mai husu ba komisaun sira iha Parlamentu atu bele bolu lalais ba iha governu hodi hadia lalais ami nia direitu ne'e, tanba to'o agora ami seidauk simu osan Covid-19 nian $ 200," nia esplika.(*)