Nia dehan, natál ho tinan foun sai hanesan loron ida importante ba ema hotu atu halo reflesaun maka'as liu tan iha ida-idak nia moris.
"Tanba ne'e ha'u konvida maluk sira hotu iha ida-idak iha uma fukun ida ne'e, atu halo revolusaun ida no transforma ita nia hahalok ne'e, transforma ita nia mentalidade emosional, ba komprensaun, ba dame, no ba badinas nune'e bele kontribui ba iha hanoin no ideias atu hadi'a ita nia nasaun", deputada Fretilin, Josefa Pereira hateten durante intervensaun iha plenária PN, segunda (21/12).
Maski nune'e, nia mós agradese ba nia maluk deputadu no deputada sira hotu iha PN ne'ebé hatudu ona amizade ba malu iha tinan 2020 nian, maibé nia mós husu deskulpa no perdaun ba hahalok ne'ebé nia halo durante debate sira iha PN.
"Hato'o ami nia boas-festas do santu natal ba kolega sira hotu iha parlamentu nasional ba ema tomak iha parlamentu nasional nian, i ami hanoin katak kosok Jesus haraik bensa ba ita hotu iha momentu ida ne'e", nia dehan.
Deputadu husi bankada KHUNTO, Luis Roberto Amaral mós hateten, nia lori partidu Kmanek Haburas Unidade Nasional Timoroan (KHUNTO) nia naran husu deskulpa ba sala ruma ne'ebé halo durante iha diskusaun programa no orsamentu sira iha PN.
"Atan ha'u husu deskulpa mós ba prezidente parlamentu nasionál, ba to'o iha maluk deputadu sira hotu karik durante iha 2020 nia laran ne'e, ita debate iha liafuan naksalak ba malu karik, lori ha'u lori partidu KHUNTO nia naran husu deskulpa ha'u fiar katak ita bele fó perdaun ba malu", nia dehan.(*)
