Projetu proposta Lei ne'e, aprezenta husi Ministru Finansas (MF), Rui Augusto Gomes no ohin halo ona Alterasaun.

"Proposta Lei ne'e governu halo tiha ona aprovasaun, eh depois proposta sei hato'o ba Parlamentu Nasional hodi nune'e parlamentu bele inisia prosesu internu parlamentu nian, no governu mos sei ba hodi hatan iha Parlamentu", Ministru Prezidensia Konsellu Ministru Fidelis Leite Magalhaes hateten lia hirak ne’e, hafoin reuniaun Konsellu Ministru iha palasiu Governu, Segunda (21/12).

Nia dehan, Projetu Proposta Lei ne’e propoin enkuadramentu foun ida ba Orsamentu Jerál Estadu no ba jestaun finanseira públika, hodi substitui Lei n. 13/2009, husi loron 21 fulan-outubru nian, kona-ba Orsamentu no Jestaun Finanseira.

Projetu Diploma ne’e halo alterasaun balun no hadi’a rejime Orsamentu Jerál Estadu no jestaun finanseira públika nian, atu aumenta klareza, estabilidade, fleksibilidade no transparénsia.

Destaka ba alterasaun definisaun kona-ba perímetru orsamentál, planeamentu ba programasaun orsamentál plurianuál, adosaun orsamentasaun tuir programa, rejime prorrogasaun lei Orsamentu Jerál Estadu nian, ba rejime ezekusaun duodesimal no ba melloria informasaun orsamentál ne’ebé prodús. (*)