Maski iha ona Dekretu Lei no 15/2012 kona ba regulamentasaun setor telekomunikasaun no rezolusaun ANC kona ba Taxa espektrum no serbisu moveis maibe iha ninia implementasaun sei la'o kude'ik tan ba seida'uk iha regulamentu espesifiku hodi regulariza licensamentu ISP.
Ministru Transporte no Telekomunikasaun (MTK) José Agostinho da Silva, rekoñese Timor Leste Seidauk iha Lei ou regulamentu atu hodi Regulariza Lisensiamentu ISP (Internet Service Provider).
"Sim, durante ne'e ita seidauk iha instrumentu legál ruma para regulariza", dehan Ministru José Agostinho da Silva ba jornalísta sira hafoin sorumutu Konsellu Ministru, iha Palásiu Governu, sesta, (08/01).
Maske nune'e, nia dehan, daudaun nee governu konstitusionál daualu prepara ona dekretu lei ida hodi regulamentaliza ba rede telekomunikasaun externál sira-ne'ebé eziste iha TL.
Nia hatutan, esbosu lei ida-ne'e rasik tama ona ba iha faze finalizasaun, no nia espera katak iha tempu badak bele tau ajendamentu iha reuniaun Konsellu Ministru bele halo apresiasaun nune'e prosede ba aprovasaun.
"Kuandu aprova ona, ita prosede ba publikasaun iha Jornál Repúblika, depois ida-ne'e, ha'u hanoin tama ba vigora. Entaun, ida- ne'e tama ba instrumentu legál ruma para bele regulariza ita-nia kompañia sira, rede externál telekomunikasaun ne'ebé iha rai-laran, ita bele regula ona sira", dehan nia.
Maibé, dadaun ne'e governu TL rasik seidauk iha instrumentu legál propriu para atu bele regulariza licensamentu ba Serbisu fornesidor Internet.
"Governu maka la iha kapasidade halo lei ka regulamentu hodi regulariza licensamentu ba kompania fornesidor internet depois estadu kriminaliza fali operador ISP sira," dehan empreza ida ne'ebe fornese Internet ba orgaun estadu balun ke hetan ona buska no aprensaun husi Autoridade Timor Leste. (*)