Apoiu báziku ne'ebé governu liuhusi SEPS oferese, relasiona ho udan-boot ne'ebé akontese iha semana kotuk (05/01) hodi hamosu inundasaun ne'ebé sobu komunidade sira nia sasán uma-laran nian hetan estragus totál.

Sekretáriu Estadu Protesaun Sívil (SEPS), Joaquim Gusmăo hateten apoiu ne'ebé governu fó ba komunidade la'ós apoiu rekoperasaun, maibé apoiu ho karáter emerjénsia de'it atu nune'e bele tulun komunidade iha situasaun emerjénsia.

"Apoiu ne'e hanesan baibian, polítika governu nian, kuandu dezastre akontese governu iha dever atu fó apoiu emerjénsia nian ba vítima sira", Joaquim Gusmăo hateten ba jornalista hafoin distribui nesesidade báziku ba komunidade sira iha aldeia Terus-Na'in.

Nia esplika, apoiu emerjénsia ne'ebé fó, iha tipu rua, hahán no la'os hahán.

"Apoiu ba hahán nian mak ita iha fós, supermie, iha susu-been ba labarik sira, iha mós hahán-lata sira ne'e, depois iha mós mina", nia dehan.

Nia hatutan, iha non-hahán mak apoiu sira ho forma pakote hanesan tasu, sanan, bikan, kanuru, lona, moskiteiru iha laran, atu bele ajuda halo kmaan netik komunidade iha tempu badak nia laran.

"Ba ita nia komunidade ne'ebé sai vitima ba dezastre iha aldeia ne'e, ita la halo evakuasaun, tanba sira dehan katak sira iha ne'e nafatin, sira hadi'a sira nia uma, no uma di'ak hela, ita fó apoiu emerjensia ba sira", nia tenik.

Entretantu, apoiu ne'ebé governu liuhusi SEPS fó ba vitima sira, hetan mós tulun husi parseiru sira hanesan, Australian Humanitarian Partnership, World Food Program (WFP), ne’ebé kada tinan sempre halo konjunta ho governu hodi fó apoiu aihan báziku ho karater emerjénsia ba komunidade.

Iha fatin hanesan, Xefi aldeia Terus-Na'in, Paulina Sarmento Barros agradese ba governu tanba bele responde preokupasaun komunidade iha tempu susar nia laran, no pandemia Covid-19.

"Hanesan autoridade lokál, hato’o ami nia sentimentu agradese ba governu tanba bele tau matan, maski ho situasaun covid, governu nafatin tau atensaun ba komunidade ne'ebé afeta ba risku dezastre ho buat ne'ebé sira afeta," nia agradese.

Autoridade lokál ne’e mós ezíje ba governu atu nune'e bele tau matan, fó apoiu ai-han, no apoiu materiál ruma nune'e bele hadi'a fatin ne'e hodi nia bele hela ho família sira.

Inundasaun ne'ebé akontese ba komunidade iha aldeia Terus-Nai'n, rezulta uma 16 mak hetan estragus ho membru família hamutuk 79.(*)