Maibé, realidade hatudu komunidade barak mak la kumpri regra sira-ne'ebé governu hasai no kontrola liuhusi protokolu Ministériu Saúde (MS) no Organizasaun Mundiál Saúde (OMS).

Ho aktu viola regra EE da-siak ne'e rasik, Polísia Nasionál Timor-Leste (PNTL), husi komandu munisípiu liuhusi operasaun ne'ebé hala'o konsege hapara atitividade festa rua iha postu administrativu Dom Aleixo, munisípiu Dili.

"Iha semana kotuk mós ita konsege hapara festa iha área Dom Aleixo nian ne'ebé maka ita komunidade sira hakarak halo festa maibé ita ba hapara, ita informa katak iha estadu emerjénsia da-siak ne'e la autoriza para atu nune'e komunidade sira halo festa, entaun ita hapara sira", Komandante PNTL munisípiu Dili, Henrique da Costa ba jornalista sira iha Kaikoli, segunda (11/01).

Nia informa, durante halo intervensaun ba festa komunidade nian, iha konvidadu ida mak lakohi kumpri regra husi autoridade tanba ho kondisaun lanu, nune'e PNTL konsege kaer no detein iha sela polísia hodi halo investigasaun.

"Festa uma-laran nian, mais ita informa ba sira para hapara. Só ke primeira ninian maka konvidadu ida mak la kumpri, tanba kondisaun lanu ona entaun nia la kumpri no ita bolu mai halo identifikasaun", dehan nia.(*)