Ministru koalia lia hirak ne'e, relasiona ho ezijénsia ne'ebé hato'o husi deputadu sira iha Parlamentu Nasionál kona-ba regulamentu ba kompañia no rede telekomunikasaun.
Governante ne'e rekoñese regulamentu ba rede telekomnikasaun to'o ohin loron seidauk iha instrumentu legál ida ne'ebé mak atu sai baze hodi regulariza rede externál liuliu ba kompañia sira.
"Preokupasaun mak ne'e durante ne'e ita seidauk instrumentu legál ne'ebé mak sai baze regulariza ita-nia rede externál sira, kompañia sira- ne'e, ita dehan rede externál, esforsu ne'ebé mak oitavu governu konstituisionál liuhusi Ministériu Transporte no Komunikasaun halo oinsá ita aselera prosesu elaborasaun dekretu lei regulamentasaun ba rede telekomunikasaun externál sira," Ministru Agostinho deklara iha Parlamentu Nasionál Tersa (12/01).
Governante ne'e hatutan, bainhira instrumentu legál ne'e iha ona, aprovadu no publikadu ona bele vigora ona nune'e regulariza kompañia telekomnikasaun sira.
Legalidade ne'ebé Ministériu Transporte no Komunikasaun sei halo mak empreza telekomnikasaun bainhira tama mai iha rai laran tenke iha lisensa SERVE (Servisu Rejistu no Verifikasaun Emprezariál, nomós tenke iha lisensiamentu setoriál, husi Autoridade Nasionál Komunikasaun (ANC).
"SERVE bele fó lisensamentu ba sira, para sira hodi estabelese konpañia atu halo saida, kuandu liga ba internet, nia tenke iha lisensamentu, iha kontekstu ida-ne'e ANC maka sei hatudu lisensa ba sira,"dehan nia.
Maibé, tuir nia haree, ba kompañia telekomnikasaun sira iha TL durante ne'e laiha lisensatura ba ida-ne'e. Tanba Timor-Leste seidauk estabelese pedidu lisensa nian inklui instrumentu legál sira- ne'ebé kompetente atu regulariza.
"Agora situasaun hanesan ne'e aktu saida mak ministériu sei halo hodi aselera prosesu elaborasaun dekretu lei regulamentasaun ba rede telekomunikasaun externál," dehan nia.
Nia fundamenta, daudaun ne'e iha ona prosesu nia laran no espera katak tempu badak sei halo ajendamentu iha Konsellu Ministru para hetan apresiasaun no aprovasaun.
"Faze sira ne'e ikus ita hakat ba faze publikasaun, kuandu públika ona iha Jornál Repúblika foin bele tama iha faze vigor. Ida-ne'e mak foin bele regulariza sira. (*)
