Deputadu bankada FRETILIN, Antoninho Bianco informa, durante halo observasaun ba prosesu fahe ai-han cesta bázika iha suku Vilaverde, folin sasán hotu ne'ebé kompaña oferese ba komunidade sira, tuir duni presu normál iha merkadu no sasán sira nia folin to'o duni dollár lima-nulu ($50) ba fulan rua nian kada membru ha família ida.
"Ohin, ami buka atu tenta haree rasik, ba haree presu nee, presu fós ne'ebé ke atu fahe, presu batar neebé atu fahe, presu koto neebé atu fahe depois na'an manu ne'ebé ke atu fahe, masin-midar ne'e, ami iha tabela ne'e ami check,, sira tau presu hotu. Entaun, husi presu ne'ebé ke iha, item sira fó ne'e soma hamutuk $50 dollár", Deputadu Bianco informa ba jornalísta sira hafoin halo fiskalizasaun direta ba prosesu distribuisaun sexta bázika iha Suku Vilaverde, Postu administrativu Verra Cruz, munisípiu Dili, kinta (14/01).
Nia dehan, sasán hirak neebé tau iha loja laran, maiória di'ak hotu, iha na'an karau ne'ebé di'ak, na'an manu broiler, iha koto di'ak, fore-mungu, inklui mós fós sira husi munisípiu Ainaro nian.
"Kondisaun di'ak, tanba ema nia loja ne'e iha kondisaun para atu-bele tau sasán hodi ema hotu sosa, ne'ebé kompañia ne'e loja aluga fatin ne'e hodi distribui sasán cesta bázika ba populasaun sira hotu", dehan nia.
Nia esplika, razaun sira tun halo fiskalizasaun, atu observa direta de'it sira uza hodi distribui ai-han ba komunidade sira ho duni seguru, tuir duni presu iha merkadu lokál.
"Razaun atu dehan katak situasaun reál ne'e halo nusá, tanba ema balu ko'alia oioin, deputadu balu ko'alia, entaun ami mai justifika took mekanizmu ne'e halo nusa. Ezemplu ema forma halo nusá, sé mak iha laran, xefi Suku, ema nia komunitária nee akompaña sira nia populasaun, iha ema ONG sira, iha ema reprezentante husi KAK mós, sira hotu iha ne'e para atu bele akompaña sasán", nia hakotu.(*)