Ohin, Uniaun Europeia halo audiénsia ho Sekretáriu Estadu Formasaun Profísional no Empregu (SEFOPE), Alarico do Rosário hodi deskuti kona-ba formasaun profísional iha setór dezenvolvimentu ekonómika Timor-Leste nian liuhusi sentru formasaun sira.
SEFOPE Alarico do Rosário, audiénsia ne'e ho Embaixadór Uniaun Europeia,ligadu ho koperasaun no servisu hamutuk kona-ba área formasaun.
''Ami ohin iha vizita ida husi señhor Embaixadór Uniaun Europeia ligadu ho koperasaun servisu hamutuk,'' Alarico ko'alia hafoin enkontru ho Embaixadór Uniaun Europeia iha sala enkontru SEFOPE Kaikoli, segunda (18/1).
Nia dehan, apoia ne'e Uniaun Europeia sei fó tanba durante ne'e Uniaun Europeia haree katak SEFOPE durante ne'e iha ninia objetivu ba oin área formasaun oinsá mak fasilita dezenvolvimentu iha rai laran.
''Tanba ne'e sira mós akompaña, sira dehan, oinsa para sira mai partisipa no sira haree ho matan, iha área formasaun ne'e iha- ne'ebé mak sira bele fó apoiu, ne'e mak ohin ami ko'alia aprezenta tiha sentru formasaun sira iha Timor laran tomak, nomoos planu ne'e SEFOPE trasa, ami esplika ba sira hotu, polítika formasaun nian hotu ami hato'o ba sira, depois sira dehan se iha oportunidade sira mós sei fo apoiu Timor-Leste liuhusi área formasaun,'' dehan nia.
Sekretáriu Estadu Alarico sei hatudu sentru formasaun akreditadu iha Timor-Leste ba Uniaun Europeia.
''Iha-ne'e ami ko'alia kona-bá sentru formasaun Tibar, SENAI Bekora, depois fundu ne'ebé durante ne'e fó apoiu ba sentru formasaun sira mai husi ne'ebé, ami esplika hotu, ne'e mak sira oinsa ba futuru sira mós fó apoiu,'' dehan nia.
Governante ne'e sei haree área ida-ne'ebé presiza atu hetan apoia, tanba ekipa tékniku sira mós hato'o ona ba embaixadór ho nia ekipa tomak, SEFOPE prontu atu koopera hamutuk ho sira, atu apoiu sentru formasaun ho área saida de'it.
''Ami sei hato'o dokumentu no ami-nia planu sira ba hotu no sira sei estuda depois sira sei mai tuur hamutuk ho ami hodi ko'alia futuru nian,'' nia subliña.
Iha fatin hanesan Embaxadór Uniaun Europia Andrew Jacobs, hatete Uniaun Europeia hasoru malu ona ho Sekretáriu Estadu Formasaun Profísional no Empregu (SEFOPE), hodi ko'alia kona-ba servisu hamutuk hodi apoiu malu iha kontestu formasaun profísional ba iha setór ekonomia Timor-Leste nian.
''Ami ko'alia kona-ba oportunidade Uniaun Europea ho governu Timor-Leste, servisu hamutuk iha kontestu formasaun profísional iha setór importante ekonómiku,'' dehan nia. (*)