Reprezentante Bankada Governu atuál Vise-Xefe Bankada PLP, Deputadu Francisco de Vasconselos, informa liuhosi konferénsia imprensa, iha Parlamentu Nasionál, segunda (18/1).

Bankada Governu konsidera pozisaun CNRT nian hatudu momos sira-nia dezesperu tanba foin semana hira liubá, CNRT abandona plenária bainhira debate ba proposta de lei nú 23/V (3a) Orsamentu Jeral Estadu 2021, no ikus halo rekursu ba Tribunal de Recurso hodi husu fiskalizasaun abstrata no susesiva de konstitusionalidade no legalidade ba norma sira iha artigu balun, Lei no 14/2020, de 29 de dezembro.

''Bankada Plataforma Governu nian konsidera ida-ne'e nu'udar aktu de dezesperu lakon podér hodi kaer ukun. Tenta blokeia OGE 2021, nu'udar raan estadu nian hodi hamoris povu nia moris,''dehan nia.

Nia haktuir FRETILIN, PLP no KHUNTO durante ne'e kestiona koerénsia Bankada CNRT nian, liuliu bainhira haree sira-nia pozisaun ne'ebé beibeik konsidera katak orgaun soberania hotu-hotu nia funsionamentu ladi'ak no kontra regra no konstituisaun, nomos duun Prezidente-Repúblika katak viola konstituisaun, duun tribunál la imparsiál no akuza governu ho inkapasidade, tanba iha momentu agora CNRT la kaer ukun.

Maibe uluk Partidu CNRT kaer ukun, sira tau ba kotuk regra sira no viola konstituisaun hodi tuir de'it sira-nia interese ba podér polítiku.

Nia konta tuir, Hanesan iha Terseira Lejislatura, governu ne'ebe lidera husi Primeiru-Ministru, Xanana Gusmão obriga Parlamento Nasional halo ajenda estraodinária ida ho plenária odamatan taka, sistema sonora taka hotu ba públiku no midia, hodi impoin aprovasaun ba rezolusaun para duni sai majistradu na'in 40 husi Portugal, tanba de'it majistradu balun hahu deskobre indisiu korrupsaun governu nian. (*)