Bankada CNRT Krítika Bankada FRETILIN kona-ba fiskalizasaun surpreza

Plenaria PN iha loron Tersa (19/1) Plenaria PN iha loron Tersa (19/1) Foto Tempo Timor

Tempotimor (Dili)-Deputada Congresso Nacionál de Reconstrução de Timorense (CNRT) Maria 'Gorumali' Barreto krítika bankada FRETILIN iha Parlamentu Nasionál ne'ebé hala'o fiskalizasaun surpreza mesak iha terrenu.

Deputada ne'e konta tuir, foin lalais iha fin de semana, Prezidente Parlamentu Nasional Aniceto Guteres fó orientasaun ba komisaun D hodi hala'o fiskalizasan iha munisípiu, nune'e deputadu ne'ebé lidera komisaun D ne'e maka Deputadu bankada FRETILIN Antoninho Bianco, iha momentu ne'e sira ba hala'o fiskalizasaun, mesak de'it no la fo hatene ba deputadu opozisaun sira seluk atu-bele partisipa iha fiskalizasaun ne'e.

''Fiskalizasaun surpreza ba iha komisaun D ka ou ema balun de'it, ida ne'e mak sai preokupasaun ne'ebé mai husi komunidade nian. Tanba ami mós halo konfirmasaun ho kolega deputadu bankada CNRT nian ne'ebé mak envolve mós iha komisaun D, sira dehan katak fiskalizasaun ne'e sira la hatene,'' Deputada Bankada CNRT, Maria Barreto kestiona iha plenária Parlamnetu Nasionál, tersa (19/1).

Nia lamenta tanba daudaun ne'e Timor-Leste adota hela estadu emerjénsia ne'ebé ho nia medida suspensaun ba atividade hotu iha estadu ne'e maibe prezidente parlamentu nasional fo fali orientasaun ba komisaun sira hodi hala'o fiskalizasaun ba munisípiu.

''Iha parte seluk mos ha'u hakarak atu husu ba kolegas deputadu sira katak, ita agora iha situasaun estadu emerjénsia ho tipu suspensaun, maibé deputadu Aniceto, autoriza komisaun sira ba halo fiskalizasaun iha munisípiu, ne'e razaun iha ka la'e,'' nia lamenta.

Hatán ba kestaun ne'e, Prezidente Parlamentu Nasionál (PPN), Deputadu Aniceto Longuinhos Guteres husu ba deputadu hotu-hotu, atu presiza haree fila-fali dekretu lei autorizasaun ne'ebé parlamentu rasik aprova ne'e.

''Ha'u husu favór ba ita-boot no deputadu sira hotu, haree fila-fali lei autorizasaun ne'ebé ita halo iha-ne'e, parese iha artigu ruma iha-ne'ebá dehan katak orgaun estadu sira kontinua iha funsionamentu,'' dehan nia.

Reforsa ba ida ne'e, deputadu bankada FRETILIN, Antoninho Bianco deklara, atividade fiskalizasaun supreza ne'ebé mak sira hala'o ne'e n'uudar devér ida hanesan reprezentante povu tún ba tau matan.

''Ami dehan vizilánsia surpreza, signifika ita halo fiskalizasaun surpreza, prontu ne'e mak ne'e ami baibain uza FRETILIN ne'e vizilánsia surpreza, maibé fiskalizasaun ne'e termu jerál, tanba ne'e mak ami tún ba kraik hodi haree diretamente,'' dehan nia.

Nia afirma, atividade vizilánsia surpreza ba atividade populasun iha kraik ne'e nudar reprezentante povu bele desidi mesak no la presiza hein orientasaun husi Prezidente PN.

''Ne'e la presiza Prezidente Parlamentu autoriza, prezidente PN só autoriza ba komisaun idak-idak servisu, maibé bankada reprezentante povu organiza aan para tún ba,'' dehan nia.(*)

Rate this item
(0 votes)
Last modified on Wednesday, 20 January 2021 09:10
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com

Kalendariu Arkivu

« February 2021 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28

Tempo Timor Networks