Tuir nia, deputadu nain 65 iha PN la'os labarik estudante sira iha eskola, atu uniformiza sira hodi hatais farda.

Deputadu Duarte husu ba PN se karik hakarak uniformiza kazaku ba deputadu, entaun entrega ba bankada sira seluk, maibé bankada CNRT totalmente la aseita planu ida ne'e.

''Ha'u atu hatais farda, deputadu ida ho kazaku ida ne'e loos ona, ne'e ba deputadu FRETILIN de'it, mais opozisaun CNRT ne'e bebas, ami lakoi tanba ita la'os estudante,'' dehan nia iha parlamentu nasionál, kinta (21/1).

Nia haktuir, wainhira deputadu sira uza farda, entaun di'ak-liu fila-fali ba eskola primária.

''Agora ita deputadu, ita atu ba fatin ruma mos tenke iha farda, entaun dala ruma, ita bele fila-fali ba ida uluk iha SD ne'e,'' hatete nia.

Iha fatin hanesan, deputadu bankada partidu demokrátiku (PD), Adriano do Nascimento hatete, nia parte diskonkorda planu kona-bá atu prodús farda ba deputadu sira, tanba osan povu nian, atu haree ba povu nia prekupasaun.

Tuir nia, bainhira parlamentu planu, hakarak uniformiza deputadu sira, hatais kazaku ne'ebé hanesan, nia prefere, bele uza produtu tais timor nian, maibé labele prodús fali kazaku sira seluk hodi estraga osan.

''Sé karik produtu hanesan tais timor nian, ha'u prontu sosa, maibé se prodús kazaku kor sira seluk, di'ak liu lalika, tanba osan povu nian, ita atu haree preokupasaun povu nian,'' dehan nia.(*)