Print this page

Taur: "Ha'u Hakarak Moris, Entaun Ha'u Tenki Simu Vasina"

By January 21, 2021 1960
Primeiru Ministru Taur Matan Ruak ko'alia ba Jornalista sira iha Palasiu Prezidensial Primeiru Ministru Taur Matan Ruak ko'alia ba Jornalista sira iha Palasiu Prezidensial Foto Arkivu

Tempotimor (Díli) - Relasiona ho enkontru semanál Primeiru Ministru, Taur Matan Ruak ho Prezidente Repúblika, Francisco Guterres Lú-Olo, ko'alia kona-bá esforsu, oinsá atu Timor-Leste hetan vasina, Taur hateten, bainhira hakarak moris entaun tenki simu vasina.

Xefe Governu ne'e hateten, Problema la'ós prontidaun atu simu vasina, maibé ema ne'ebé hakarak salva vida ou lakohi mate, iha obrigasaun no tenki prontu, hodi simu vasina kontra Covid-19

"Ha'u hakarak moris entaun ha'u tenki simu vasina, ne'ebé ema hotu ne'ebé hakarak moris ne'e vasina iha ne'e simu, ida ne'ebé mak lakoi, hakarak mate lalais ne'e, bele bá uluk", dehan Taur ba Jornalista sira, iha Palásiu Prezidensiál Bairu-Pite, Díli, kinta (21/1).

Xefe governu ne'e akresenta, Ministériu Saúde planea hela, iha tempu badak sira sei haree, iha posibilidade atu hahú uluk vasina ne'e, husi RAEOA nomos área ne'ebé besik fronteira

"Informasaun ne'ebé daudaun ne'e ha'u iha, planea para atu ba Oecusse pois mak neneik ba iha parte fronteira tenki halo nomos iha Díli laran", Taur informa.

 Taur husu sidadaun hotu tenki koopera, atu labele prejudika ema hotu, tanbá númeru kazu Covid-19 iha nasaun viziñu indonézia hanesan Atambua no Kupang kontinua aumenta, tanbá Governu mos propoin ona ba PR atu deklara tan estensaun Estadu Emerjénsia.

"Dalabarak ita hanoin hanesan ne'e, bosok maibé haree didiak ne'e besik los ita, iha Kupan iha Atambua aumenta makas, entaun se la koopera sei prejudika ita hotu. Ha'u hanoin tenki koopera, ita boot sira hatene, iha tempu agora ne'e, sei halo tan estensaun ba dala sanulu", Taur hateten.

Hafoin remata enkontru semanál, Xefe Ezekutivu ne'e informa katak Prezidente Repúblika mos apoia planu hirak ne'e no husu ba governu atu kontinua tau matan ba fronteira, taka fronteira no sensibiliza sidadaun sira, atu kumpri regras protokolu ne'ebé mak Ministériu Saúde (MS) no Organizasaun Mundiál de Saúde (OMS) fó, tanba Ministériu Saúde nia moto mak, "Saúde Iha Ita Nia Liman Rasik".(*)

Rate this item
(0 votes)
Last modified on Thursday, 21 January 2021 16:59
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items