Liu husi komunikadu imprensa ne'ebe fo sai husi bankada Fretilin informa, iha loron 7 fulan julhu 2020 sekretariu jeral partidu Fretilin, Mari Alkatiri aprezenta keixa ida ba Ministério Públiku kontra individú balun nu'udar membru Komisaun Polítika Nasional, partidu CNRT nian, ne’ebé halo akuzasaun katak ex-primeiru ministru Mari Alkatiri simu suborno husi empreza internasionál ida.

Tanba ne'e Partidu Fretilin kondena tebes atitude “suspeitos” sira no konsege aprezenta kazu refere ba tribunal, maibe foin lalais ne'e patidu refere liu husi reuniaun CPN extra-ordinária ida koko interven kompetensia Ministeiru Publiku nian, hodi desidi fali prezidente partidu CNRT Xanana Gusmão mak atu hatán ihá tribunal nu'udar arguidu.

"Hahalok ida ne'e hatudu, hahalok ida infantil no irresponsável. Hanesan labarik ida halo sala halai ba subar ihá nia amã nia saia,"dehan iha komunikadu imprensa iha Bankada FRETILIN iha parlamentu nasional, tersa (26/1).

Bankada FRETILIN konsidera akuzasaun ida-ne’e indevida no ho objetivu atu halo foer Dr. Mari Alkatiri nia naran, nia dignidade no reputasaun. Tanba ne'e lolos Xanana Gusmão la ós parte lejítima ba prosesu ida-ne’e, tanba ida-ne’e prosesu justisa Alkatiri entre ho CPN-CNRT.

Komunikadu ne'e mos haktuir, iha prosesu ida ne'e Alkatiri la halo akuzasaun kontra Xanana Gusmão, no Ministério Públiku mos la’ós notifika Xanana maibé notifika indivídu balun, ne'ebé mós nudar membru CPN partido CNRT.

"Responsabilidade kriminal né individual no intransmissivel, tuir kódigu penal artigu 12 ema ida-idak hatán ba nia hahálok krimi no labele soe fali nia responsabilidade kriminal ba ema seluk. Ita labele halo tentativa politiza Justiça, polítika ihá nia fatin no Justiça ihá nia fatin,"deklara iha komunikadu refere.