Programa fó-sai hafoin Sekretáriu Estadu Kooperativa (SEKoop), Elizário Ferreira ho Claude Nomsi nu'udar Financial Inclusion Coordinator Programme iha UNCDF nian hala'o diskusaun ida hodi bele selebra kontratu ida entre UNCDF ho SEKoop, nune'e bele dezenvolve ona programa "novos tecnologicos" ba iha dezenvolvimentu kooperativa nian.
Elizário esplika, iha programa rua mak sei oferese husi UNCDF mak hanesan, programa dezenvolvimentu téknolójiku foun nian ho formasaun no estudu komparativu.
"Dezenvolvimentu téknolójiku ne'e maka ami ko'alia kona-ba oinsá mak atu-bele iha data server ida iha Timor uza hanesan kór ka bandeira kooperativa nian hodi serví membru kooperativa sira ho di'ak", dehan SEKoop, Elizário Ferreira ba jornalísta sira iha Akait, tersa (26/01).
Nia dehan, atu membru sira utiliza didi'ak data server ne'e, presiza liuhusi formasaun sira hanesan halo operasaun no manutensaun, inklui mós oinsá kontrola no utiliza ho di'ak.
"Entaun, tenke idak-idak iha ninia nível no balu oinsá mak atu-bele halo programa interligasaun entre kooperativa ida ho seluk, atu nune'e dezenvolvimentu kooperativa ne'e bele la'o di'ak liután tuir sistema integradu," dehan nia.
Entretantu, kona-ba bainhira mak atu hahú kooperasaun ne'e, nia dehan, parte SEKoop tenke revé fila-fali proposta sira-ne'ebé antes halo ona.
Nia espera iha fulan marsu 2021 bele tama ona implementasaun.
"Ami halo diskusaun ne'e la'o di'ak ona, iha tempu besik sei implementa liuhusi akordu ruma atu-bele buka solusaun ba atendimentu kooperativa nian ba membru sira. Ida ne'e mak objetivu prinsipál", nia hakotu.(*)