Porta-vóz Governu nian, Ministru Prezidénsia Konsellu Ministrus, Fidelis Manuel Leite Magalhães, lori Konsellu Ministrus no Governu nia naran, aprezenta sentidu kondolénsia ba estimadu deputadu Sabino Soares “Guntur” nia família no belun sira.
"Ami lamenta ho ninia mate, maibé ami la haluha no ami fó onra ba ninia liman-rohan husi moris ida ne’ebé nia dedika sein kondisaun ba pátria no ba povu timor”, dehan Ministru Prezidénsia Konsellu Ministrus, Fidelis Manuel Leite Magalhães, liu-husi konferénsia imprensa, hafoin reuniaun Konsellu Ministru, iha Palásiu Governu, kuarta (27/01).
Governu Timor-Leste triste no neon kraik, bainhira simu informasaun katak, Deputadu Parlamentu Nasionál no Vise-Prezidente ba Komisaun Polítika Nasionál (CPN) husi Partidu Libertasaun Populár (PLP) nian, Sabino Soares “Guntur” hakotu ona iis, iha loron 23 fulan janeiru tinan 2021 ne'e, iha Ospitál Nasionál Guido Valadares (HNGV: sigla portugés), Díli no hakoi iha Jardin dos erroi Metinaro iha Kinta, 28 Janeiru 2021.
Matebian deputadu Sabino Soares “Guntur” moris iha loron 8 fulan jullu tinan 1975, iha Lelalai, Postu-Administrativu Quelicai, Munisípiu Baucau.
Matebian nu’udár mos membru fundadór PLP nian, hahú fulan juñu tinan 2018, matebian hahú hala'o nia funsaun hanesan, deputadu Parlamentu Nasionál iha V Lejizlatura no membru husi Komisaun G ne'ebé trata asuntu Edukasaun, Juventude, Kultura no Sidadania.(*)