Tuir Sekretária Meza Parlamentu Nasionál (PN), deputada Lidia Norberta, aktu suspensaun ne'e parte ida hodi fó tempu ba eis Ministru Turizmu Komérsiu no Indústria (MTKI) ne'e ba presta deklarasaun iha tribunál.
"Ohin Prezidente Parlamentu Nasionál (PPN) Aniceto Longuinhos Guterres Lopes mós aprezenta ba lider bankada sira, kona-bá pedidu ida husi tribunál no ministeriu pùbliku mai iha parlamentu nasional atu halo suspensaun ba mandatu señor deputadu Antonio da Conseição, para ba presta nia deklarasaun iha tribunál," dehan deputada Lidia iha PN, Sesta (29/1).
Liga ba pedidu suspensaun ne'e, PPN sei haree no tuir planu sei tau ajenda entre fulan feveireiru, Marsu ka Abril nia laran.
"Tribunál nia pedidu mai PPN ne'e iha 19 janeiru ne'e, ne'ebé agora ita termina janeiru ne'e, maibé dentru de fevereiru ka marsu ne'e, ita sei buka atu halo ajenda, ka pelu menus antes de 8 de Abril ne'e," katak nia.
Nia haktuir, PN sei halo suspensaun tanba tuir termus levantamentu imunidade nian, ne'ebé iha ninia konteudu ida ko'alia kona-ba suspensaun ne'e.
"Suspensaun ida ne'e la'os totál, suspensaun ne'e so halo de'it ba iha loron ne'ebé señor deputadu ne'e, ba presta deklarasaun iha tribunal, wainhira konklui tiha ninia prosesu hotu, kona-ba nia ba responde iha tribunal, nia fila fali mai asumi nafatin ninia funsaun hanesan deputadu," Nia esplika.
Molok ne'e, deputadu bankada Partidu Demokralátiku (PD) ne'e aseita ona atu ba koopera ho parte jutisa ligadu ho kazu ne'ebe akontese bainhira nia asume hela kargu hanesan Ministru Turismu Komersiu no Ambiente (MTKA) iha tinan 2014.(*)