Manuel Pinto nu'udar Prezidente Ajénsia TATOLI- Ajensia Notisioza Timor-Leste, Institutu Públiku (IP) ba mandatu tinan-haat.
Nomeasaun ba Prezidente Ajénsia TATOLI ne'e, liuhosi Proposta Rezolusaun Governu, ne’ebé bazeia ba sob proposta MAPKOMS.
Estruturante ba Konsellu Diretivu kompostu husi Vise-Prezidente Asuntu Mídia no Jornalístiku, Xisto Freitas Piedade no Vise-Prezidente Asuntu Administrasaun no Finansa, Olandino da Costa. nomeasaun Vise-Prezidente na’in-rua bazeia ba sob proposta Prezidente Konsellu Diretivu ba ministru tutela.
Iha seremónia tomada pose ne'e, Ministru Francisco Jerónimo apela ba Konsellu Diretiva Ajénsia Tatoli atu serbisu maka’as no sai mídia estatál ne’ebé kredível bainhira divulga informasaun ba públiku, liuliu transforma insititusaun refere sai diferente ho karáter mudansa pozitivu ba sosiedade.
nNa parte sei iha konfiansa boot, ba Ajénsia TATOLI no konfiansa ida ne'e mak sai hanesan reponsabilidade boot atu sira komunga.
“Ha’u iha konfiasa ba ita-bo’ot sira hotu ho ekipa, atu halo buat hotu tuir ema hotu nia hakarak, no labele ikus iha kotuk kompara fali ho mídia seluk, maibé tenke iha oin ho kredível, tanba ne’e presiza serbisu maka’as no lalais,” Ministru hato'o rekomendasaun ne'e hafoin remata abertura pose iha salaun Prezidénsia Konsellu Ministru, Palásiu Governu, segunda (1/2).
Durante deskursu, Ministru Francisco fó parabens ba ekipa tomak iha Ajénsia TATOLI atu asume kna’ar ho resposabilidade.
Iha sorin seluk, Prezidente Ajénsia TATOLI, Manuel Pinto, agradese ba fiar ne’ebé governu daualu liuhusi MAPKOMS no SEKOMS fó ba nia atu lidera mídia estatál ne’e.
Nia dehan, iha faze inísiu mandatu, iha vizaun atu halo mídia Estadu ne’e bele goja direitu autónomia administrativa, finanseira no patrimóniu própriu.
Tanba ne’e, nia prefere liuhosi programa jerál rua hanesan dezenvolvimentu institusionál no espansaun konteúdu bele hasa’e dezempeñu serbisu ho kualidade, hatuur regra no regulamentu tuir nesesidade inklui hasa’e kualidade atendimentu direitu informasaun.
Maibe atu atinji buat hirak ne'e, dalan estratéjiku neen maka sei determina liu-liu orienta ninia ekipa sira iha serbisu operasionalizasaun.
Antes ne’e, iha loron 01 setembru 2020, Manuel Pinto, asume knaar nu’udar Prezidente interinu Ajénsia TATOLI to’o agora, hodi troka Prezidente sesante, José da Costa, ne’ebé deside rezigna-aan no husik kargu ne’e iha loron 31 agostu 2020.
Iha loron 07 marsu 2017, liuhosi reuniaun Konsellu Ministru aprova kriasaun Ajésia TATOLI, nu’udar kontinuasaun hosi kriasaun portál notísia ida http://tatoli.tl, ne’ebé estabelese ho embriaun hanaran ANTIL, hafoin muda naran ba TATOLI.(*)