Deputadu Abel Pires hato'o lia hirak ne'e, relasiona ho desizaun Vise-Ministru Interiór (VMI), António Armindo, ne'ebé hapara kontratu ho Kompañia R2M, kona-bá projetu Border Information Management Sistem (BIMS).

Tuir Abel, Kualker Kompañia husi Timor-oan merese hetan tratamentu ne'ebé justu husi governu, tanba Kompañia hirak ne'ebé investe ona sasan, depois governu derepente halo mudansa iha kontratu, ida ne'e prejudika tebes ba Kompañia.

"Governu iha obrigasaun atu fasilita ita-nia Kompañia sira i depois favor labele kahor problema ne'e," dehan Abel ba www.tempotimor.com, iha PN, Díli, Tersa (02/02).

Deputadu PLP ne'e hatutan, presiza tebes atu governu promove no tau matan ba Kompañia lokál sira no proteje sira-nia direitu, tanba kompañia Timor-oan sira ne'e, fó mos servisu ba Timor-oan sira seluk.

Deputadu bankada governu ne'e husu mos ba governu, presiza atu halo separasaun entre kontratu, labele kahor. Tanba tuir Abel, bainhira iha kontratu R2M fornesimentu BIMS la hanesan ho kazu internet, ne'ebé antes ne'e Polísia Nasionál Sentru Investigasaun Kriminál (PNSIK) buska no detein, ikus mai tribunál deside Termu Identidade Rezidénsia (TIR).

"Se internet entaun internet, se fornesimentu ne'e fornesimentu, kada projeitu nia kontratu ketak-ketak, labele kahor buat sira, ne'e la justu," hakotu Abel.

Antes ne'e, Kompañia R2M ne'ebé akompanã husi Defensór Públiku, Albino de Jesus Pereira, hato'o keixa ba Polísia Sientífiku Investigasaun Kriminál (PCIC: sigla portugés), hasoru Vise-Ministru Interiór, António Armindo inklui Asesór legál, Andre Fernandes no Eis Asesór IT Servisu Migrasaun, Christopher Squire, relasiona ho desizaun hapara kontratu no keisa ba PNSIK hodi investiga kompania R2M maske kompania refere simu orden husi parte Ministeiru Interior hodi devolve hikas osan Governu nian ba konta bankaria operasional Ministeiru interior iha Janeiru 2021 (*)