Tuir nia, dadauk ne'e, orsamentu vensimentu ba saláriu funsionáriu sira, governu liu husi Ministériu Finansas (MF) tranfere hotu ona ba funsionáriu ida-idak nia konta bankária.
Maibé kona-bá funsionáriu balun ne'ebé seidauk simu, ida ne'e, governu liu husi diresaun rekursu umanu, dadaun ne'e, halo hela rekollamentu, atu hadi'a, ida ne'e, la signifika, governu la halo pagamentu, maibé governu sei selu.
"Relasiona ho saláriu sira ne'ebé señor deputadu sira foti, dehan katak la simu, sim saláriu ne'e transfere hotu ona ba ida-idak nia konta bankária, ne'ebe Ministériu sira halo, los duni ami mos rekoñese katak, iha balun falla, ne'e la'os dehan katak la selu, lae, ne'e haruka hotu ba," dehan nia, iha PN, tersa (2/02).
Governante ne'e esplika, iha Ministériu balun, iha funsionáriu barak simu ona, maibé balun la tama iha sistema. No ida ne'e, la'os buat ne'ebé segredu, maibe ida ne'e normál, dalaruma fallansu iha sistema, ho ida ne'e, governu sei buka meius, atu rezolve.
"Entaun ida ne'e mak, ami hakarak informa i diresaun rekursu umanu rekolla fila-fali ona funsionáriu sira ne'ebé seidauk hetan saláriu ne'e. Ministériu Finansas halo fila-fali prosesu, atu halo pagamentu ba sira nia osan," dehan nia.(*)