Suku lima hanesan, Lisapat, Maubu, Urahou, Fatubolu, no Fatubesi ne'ebé antes ne'e hola-parte iha postu-administrativu Hatulia, Munisípiu Ermera, maibe haree ba populasaun hamutuk rihun 40, entaun MAE hamosu planu ida atu aldeia lima ne'e sai postu-administrativu ketak ida.
"Ministériu prepara hela alterasaun ba lei diviziaun administrarivu territóriu atu konsidera mós Hatulia B sai tan postu foun iha munisipiu Ermera," Ministru Administrasaun Estatal, Miguel Pereira de Carvalho ko'alia hafoin reuniaun Konsellu Ministru, iha Palásiu Governu, kuarta (03/02/21).
Komunidade iha ne’eba deside atu iha postu administrativu ketak intermu populasaun boot no geografikamente defísil asesu ba Hatulia A maske iha poténsia oin-oin nune’e governu hanoin atu kria postu foun iha Ermera.
"Kriteriu oin-oin mak populasaun, jegrafiku, poténsia, rekursu naturál iha área refere," tenik nia.
Governu planu harii postu foun, atu nune’e populasaun bele asesu ba servisu governu nian.
Nia dehan, estabelese estrutura barak ne’e la'os tau administradór no funsionáriu maibé governu hakarak serbisu estadu nian besik liu ba povu. (*)