Deputada Fernanda Lay haktuir, to'o oras ne'e cesta bázika ne'ebé kompañia distribui ba iha munisípiu Aileu, Bobonaro, Viqueque, no Baukau inklui Dili, maibé iha distribuisaun ne'e suku ida, rua de'it maka simu, no balun la simu total to'o agora.
"Kona-bá cesta bázika, la'os de'it iha Dili maka seidauk simu, maioria munisípiu ne'ebé ha'u identifika katak, Aileu, suku tolu de'it mak simu, no restu seidauk simu, inklui suku Batata iha Uatu-carabau, katak sira mos seidauk," relata nia iha plenária Parlamentu Nasionál, segunda (8/2).
Nia husu governu atu klarifika, sera ke orsamentu mak laiha ka oinsá.
Nia konsidera daudaun laiha dalan ba governu atu dehan orsamentu laiha, tanba orsamentu ba programa ida ne'e parlamentu aprova tiha ona iha tinan kotuk 2020, no iha 2021 mos parlamentu tau tán millaun $114.
"Tanbasá mak la selu, governu tenke hato'o buat ruma," dehan nia.
Nia parte kestiona pagamentu ba kompaña distribuidór cesta bázika, tanba maiske kompana sira uza sira nia osan hodi kompra aihan fahe ba populasaun sira, maibe to'o agora sira la hetan pagamentu husi governu.
"Tanbasá, orsamentu parlamentu aprova ho montante boot," dehan nia.
Entretantu Ministru ba Asuntu Parlamentár no Komunikasaun Sosiál (MAPKOMS), Francisco Martins Jerónimo, rejista ona preokupasaun hirak ne'e no sei submete ba iha kada ministériu kompetente atu buka solusaun.(*)