Odete Belo akresenta lia hirak ne'e hodi responde ba krítika ne'ebé hato'o husi deputadu sira iha PN kona-ba servisu Ministra Saúde nian ne'ebé foka de'it ba surtu covid-19 hodi hasees tiha moras seluk ne'ebé iha ospitál.
"Ha'u hakarak dehan de'it deputadu sira iha direitu atu ko'alia maibé ha'u hanesan ministra saúde, ha'u tenke haree lai surtu ne'ebé akontese no surtu ne'e kuandu akontese, estadu emerjénsia akontese ita la halo buat ida. Sira la servisu, ita mós la servisu, ita hotu-hotu tau matan ba surtu ida-ne'e," nia informa ba jornalista sira, iha Palásiu Governu, kuarta (10/02).
Governante ne'e akresenta, bainhira deputadu sira dehan MS la halo servisu presiza haree husi parte ne'ebé, durante ne'e sentru saúde, ospitál kontinua funsiona normál.
"Maibe ita loke nafatin, ita trata moras saida de'it iha-ne'ebá, ita la'ós trata covid iha-ne'ebá," dehan Odete.
Odete hatutan, alende MS tau atensaun ba covid, tau atensaun ba moras sira seluk, maibé kona-ba Covid-19 nian mak presiza atensaun de'it ba prevensaun no preparasaun ba vasina.
"Ne'e importante tebes, la signifika dehan la tau matan ba moras sira seluk entaun ospitál ne'ebá tau fali moras saida?," hakotu Odete.
Antes ne'e Deputadu balun iha PN lansa krítika ba Ministra Odete Belo tanba konsidera laiha kapasidade no fó prioridade ba de'it surtu covid-19 no la tau atensaun ba moras sira seluk.(*)