Tuir, Sekretariu Jeral Interinu partidu CNRT Jacinto Rigoberto, Iha loron (14/1) liu ba, Virgílio Simith, Jacinto Viegas, Jacinto Rigoberto ho Bendito Freitas, no Iha fali loron 5, fulan fevereiro ne'e, Tomás Cabral, Francisco Ikulai no Francisco da Costa Guterres simu ona TIR. Nune’e tempu besik Ministériu Públiku mós notifika ona deputadu na’in 21 inklui PN mós hasai ona sira-nia imunidade.
"Deklarasaun Prokurador Jeral Repúblika (PJR) José da Costa Ximenes ne'ebé fó sai, iha loron 5 fulan janeiru tinan ida ne'e, molok sai husi audiènsia ho Prezidente Repúblika, karik Ministériu Públiku sei bolu mós deputadu 21 husi bankada CNRT. Ne'e duni ita hotu hein bainhira maka PN hasai imunidade husi Deputadus CNRT nian atu bá aprezenta-aan iha MP, hodi prosesu ne'e bele la'o ba oin," dehan Nia liuhusi konferénsia imprensa iha sede partidu CNRT Bairo dos Grilhos, Tersa (16/2).
Nia mós atualiza andamentu kona-bá prosesu lori Membru CPN partidu CNRT ba Ministériu Públiku ne'ebe hetan ona Termu Identidade Rezidénsia (TIR). Tanba liu tiha ona loron Sanulu, membru CPN hato'o sira-nia pozisaun kona-ba kontinuasaun ba prosesu ne'e, tanba sira hotu simu TIR, ne’ebé impede liberdade de movimentu, la'ós deit nu’udar membrus CPN maibé mós hanesan sidadaun ida.
Membru CPN Partidu CNRT mós hein ho esperansa katak MP halo duni servisu ne’ebé di’ak no lais, tanba membrus CPN la konkorda ho TIR atu prolonga indefinidamente.(*)