Reprezentante bankada CNRT, Deputada Maria Terezinha Viegas, situasaun agora governu nia jestaun orsamentu hetok no rungu-ranga, sikúlu orsamentu sai la normál, halo mudansa ba sistema finansas no viola Lei Orsamentu no Jestaun Finanseira (LOGF).
"Bankada CNRT hare Governu bása hirus matan ho orgullo bain-hira introduz orsamentu bazeia ba programa, maibé foin de’it mak koko atu implementa, hahú kedan ho kúa 7% orsamentu kada ministériu sira hodi finansia programa sesta bázika ne’ebé la ezisti iha OJE 2021, atraza selu emprezáriu no kompañia sira, selu tarde saláriu funsionáriu públiku no seluk-seluk tán,"dehan Nia iha intervensaun jeral bankada CNRT nian iha plenaria PN, tersa, (23/02/21).
Bankada CNRT konsidera deskobretamentu sira husi Câmara de Contas ne’e hatudu, Governu bain-hira recoilla reseitas, alokasaun, ezekusaun orsamentu iha aprezentasaun, tenke konsolida hamutuk iha perímetru orsamental nian.
Saldo Reziaun Administrativa Espesial Oekusi Ambenu (RAEOA), Autoridade Nasionál Petroliu no Minarais (ANPM), no Institutu Petrolíu Geologia (IPG), tenke konsolida hamutuk iha saldo tezouru estadu, nune’e labele hamosu dezorsamentasaun.
Tuir bankada CNRT, deskobre iregularidade ne'ebé governu hamosu iha tinan 2019 hamutuk 7.
Parsialmente governu no entidades relevantes foin ezekuta 12 rekomendasoins, husi 26 rekomendasoins relatóriu Kamara de Kontas (CdC) iha Konta Jeral do Estadu 2018 ne’e hatudu governu seidauk sériu hadia aan no kontinua komete lapsu no irregularidade.
Saldo tezouru estadu iha 31 fulan dezembru tinan 2019 demonstra ho valor global hamutuk tokon $278,1 dólares, konforme CdC relata, saldo ida ne’e la engloba RAEOA, ANPM no IPG nian.
CdC deskobre mós fim do ano 2019 ministériu sira sei halo kontratu-obrigasaun ba empreza sira atinzi to’o tokon $3,6 dólares, kontratu obrigasaun ne’e ultrapassa tiha tempu pagamentu nian iha ano fiskál ida nia laran.
Dívida naun finanseira pur kategoria ekonómika apresenta tokon $27,8 ne’ebé governu seidauk selu, tanba monu ona tempu ba pagamentu nian. Dívida nun finanseira ne’e involve entidades administrasaun direta, ajénsia autónomas no orsamentu ba munisipius sira nian.
RAEOA iha final de 2019 akumula saldo tezouro bo’ot tebes iha sira nia konta, total akumulasaun tokon $253,4 dólares, kuaze ekuilíbriu ho aaldo tezouru estadu ne’ebé totál tokon $278,1 dólares. RAEOA rai osan barak iha saldo, enkuantu tinan-tinan obrigadu, tenke foti osan fundu petrolíferu liu rendimentu sustentável estimadu (RSE) liu 3% tuir Lei haruka.
Tuir relatóriu CdC hatudu, reseitas domestika RAEOA tokon $5,9 dólares la haruka ba iha konta estadu. Aliende ne’e, relatóriu ezekusaun RAEOA iha 4 trimestre nian la aprezenta ba iha Ministériu Finansas, tanba-ne’e maka Ministériu Finansas la entrega relatóriu RAEOA nian (relatóriu ezekusaun 4 trimestre) ba kâmara kontas.
Rejista diverjénsia valor adiantamentu em dineiro ne’ebé ejisti tuir relatóriu ministériu sira tokon $5,9 no valor konstante tuir relatóriu monitorizasaun pagamentu iha tezouro ne’ebé rejista total adiantamentu ho montante osan $23,8 milhões de dólares (pj. 65/66).
Governu ho kâmara kontas uza terminologia ne’ebé la hanesan iha konta jerál estadu, kestaun ne’e difikulta CdC no hamosu diskripánsia iha dadus ne’ebé apresenta iha relatóriu ida ne’e.
Ho situasaun hirak ne'e mak, bankada CNRT husu governu atu hadi'a aan. (*)
