Ho preokupasaun ne'e, deputadu Joaquim hatete, karik sidadaun ne'ebé ladún ta'uk moras Covid-19, di'akliu sidadaun ne'e haree mate mesak ba, lalika lori fali ema barak mak ba mate hamutuk fali.
"Ita-nia, sidadaun balun iha fronteira ne'e dezobediente, favor ida ita rona malu, Sé hakarak mate-mate mesak, lalika lori ema seluk ba mate hamutuk ho nia," deklara nia iha Parlamentu Nasioná, kuarta (24/2).
Nia konsidera problema transmisaun lokál kontinua akontese tanba nia hún loloos mak sidadaun sira iha fronteira tanba laduun rona saida mak estadu ko'alia.
Tanba ne'e, nu'udar reprezentante povu, husu sidadaun hotu tenke rona malu, no rona saida mak governu ko'alia, hanesan informasaun no medida sira-ne'ebé governu aplika, tenke kumpre, tanba orden no konfiansa estadu nian.
"Ita tenke fó respeitu ba ema sira-ne'ebé hala'o kn'aar seguransa ne'e no ema sira hala'o kna'ar saúde ninian ne'e," dehan nia.
Nia esplika, karik sidadaun fó konfiansa ba estadu, ida ne'e la'os atu nia dignidade ka osan mean ruma mak atu monu para ema seluk hili maibé fó valór ba ita-nia moris.
Nia husu se sidadaun la rona ema seluk entaun ida-idak presiza rona ninia aan no uza ninia konsiénsia rasik, sé hakarak moris entaun tenke hakmatek.(*)