Governu Ko'alia Ho Kompaña Seven Air Loke Eskola Pilotu iha TL Featured

MINISTRU Transporte Komunikasaun Jose Agustinho Ko'alia ho jornalista iha Palasiu do Governu MINISTRU Transporte Komunikasaun Jose Agustinho Ko'alia ho jornalista iha Palasiu do Governu Foto Tempo Timor

Tempotimor (Dili) - Kompaña aviasaun ida husi Portugal ho naran Seven Air iha hakarak atu loke eskola iha area pilotu iha Timor Leste.

Kompaña Seven Air hato'o sira-nia hakarak ba Ministru Transporte no Komunikasaun José Agustinho ne'ebé hala'o vizita serbisu ba Kompaña refere.

Ministru José dehan, kompañia Seven Air durante ne'e fó formasaun pilotu nian no formasaun tekniku aviaun nian.

"Seven Air ne'e fó formasaun, eskola pilotu nian, depois eskola ba tékniku sira oinsa mak bele hadia aviaun," informa ministru José iha palásiu governu, Segunda  (27/05).

Iha vizita ne'e, nia hatutan, kompaña refere hatudu sira-nia interese atu loke eskola pilotu iha Timor Leste.

"Sira mós iha planu, esforsu atu oinsa bele loke eskola pilotu iha Timor Leste, mais ita hotu hatene, ida ne'e kustu la'os kiik, kustu ne'e boot, entaun liga ba merkadu ema sei tetu no análiza buat sira ne'e”, dehan ministru.

Ho hakarak ida ne'e, Ministru dehan iha futuru bainhira governu Timor Leste iha posibilidade bele koordena oinsa atu loke eskola refere.

Maibé se labele loke eskola iha Timor Leste, kompaña mós disponivel atu simu Timor-oan sira hodi ba tuir formasaun iha Portugal, tantu liu husi edukasaun formal no naun-formal.

Ministru José esplika katak, kompaña Seven Air deklara bele ajuda fó formasaun ba Timor-oan iha area ne'ebé liga ba transporte no komunikasaun.

“Ita iha transporte marítima, aero no terestre entaun sira bele fó asistensia iha área tolu ne'e. Ita mós iha komunikasaun, oinsa mak bele kria ita-nia sistema komunikasaun ida ke di'ak, oinsa mak sira fó asinstesia ba autoriedade regulador. Portantu area sira ne'e mak  (sira) bele fó asistensia”, dehan nia.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.