“Iha Munisípiu Covalima nomoos Bobonaro haree ba nesesidade báziku, ha’u hakarak fo de'it dadus balun ne'ebé mak horiseik ha’u foin simu husi baze, liuliu kona-ba foos, foos iha postu Tiliomar ida 25 kg ne’e nia kustu ne’e 20 dolar, iha Fatumea 17 dolar, iha Fatululik 18 dolar iha fohoren 17 dolar, Zumalai, Maukatar, Suai Vila 16 dolar,” Deputadu Bankada FRETILIN, Alexandrino Cardoso da Costa ko’alia liuhosi debate estensaun EE XI, iha Parlamentu Nasionál, segunda,(1/3).
Nia informa, stock foos iha Covalima laiha ona tanba akuza hosi lockdown total ne’e entaun atividade hotu paradu, komunidade agora halerik hela ba ai-haan sira-ne'e.
Tanba ne'e husu ba oitavu governu konstitusionál atubele buka solusaun liuliu ba foos.
“Ami halo fiskalizasaun iha Sentru Lojístika Nasionál iha foos 28 mil toneladas nia objetivu ida atu halo intervensaun ba merkadu bainhira mosu situasaun krize ruma kona-ba folin fós sa'e derrepente entaun ha'u hanoin ho ida-ne’e governu bele haree ona ba kestaun ida-ne’e," nia rekomenda ba governu. (*)