Vise-Ministru Interior António Armindo, hateten ameasa pandemia COVID-19 iha fronteira fó risku Membru Unidade Polísia Fronteira (UPF) ne'ebé asegura fronteira terrestre entre Timor-Leste ho Indonézia, nune'e ekipamentu protesaun ba saúde importante hodi satán surtu COVID-19.
“Ha’u ko’alia daudaun ho Ministra Saúde para haree took bele supplay tán maskára ho seluk-seluk ne'e, ohin responde ona. Hela oituan depois sira kompra tán depois fahe ba ita,” Vise-Ministru Interior António Armindo, ko’alia iha Palásiu Governu, Tersa (02/03).
Nia hatutan, maske oras ne’e iha aplikasaun serka sanitaria (lockdown) maibé atividade importansaun sasán liuhosi fronteira la’o hela entaun parte seguransa sira tenke iha ekipamentu protesaun pesoál hodi kontrola liuhosi maneira rega dezinfetante no troka kondutór.
“Ha’u ko’alia ona ho Primeiru Ministru (PM) hanesan Ministru Interiór karik kuandu ita loke fali tanba nia (Xefe Governu) mak tenke asina despaxu no ita hanoin para hanesan fali uluk, tama iha kuarta no karreta sai fali iha sesta,” dehan António.
Nia dehan, ministériu nafatin tau atensaun ba kondisaun seguransa iha fronteira no iha tinan ida-ne'e prevé osan hodi reablita postu seguransa neen (6) fazeadamente.(*)