Tuir deputadu Aniceto Longuinhos Guterres Lopes, atua PPN, katak, Parlamentu Nasionál (PN) nu’udar orgaun lejisladór, entaun atu hasai imunidade ruma ba deputadu ida, tenke bazeia ba notifikasaun husi tribunal, la'os rona fali ema ne’ebé kanta de’it iha liur.

"Bainhira notifikasaun husi tribunal iha ona mak ami bele halo prosesu, la'os tur-tur dehan komu la gosta para atu foti kedas imunidade ne'e la'e," dehan Aniceto iha PN, Sesta (5/3).

Lidér lejisladór ne’e esplika, normalmente to'o agora, seidauk iha notifikasaun ruma ne'ebé Parlamentu Nasionál simu husi tribunál ka Ministériu Públiku (MP) atu halo levantamentu imunidade ba deputadu 21 husi bankada CNRT.

"Por enkuantu to'o agora, imunidade ba deputadu CNRT ne’e, PN seidauk simu pedidu ruma ne'ebé hato'o husi MP ka tribunal," hatete Nia.

Molok ne'e, vise xefe bankada CNRT Patrocino do Reis Fernandes ejize ba Parlamentu Nasionál atu hasai ona imunidade ba deputadu 21 husi bankada CNRT atu aprezenta aan iha MP.

Patrocino espresa lia hirak ne’e, tanba iha loron 5 Fevereiru, Prokuradór Jerál Repúblika (PJR) José da Costa Ximenes fó sai katak, MP sei notifika no bolu deputadu 21 husi bankada CNRT atu ba presta deklarasaun.(*)