Nia esplika, estatutu Partidu Fretilin iha artigu ida mós defini katak laiha kargu vitalísia iha partidu laran. Maibé estatutu mos hatete militante ka kuadru ida atu kandidata-an ba lideransa Partidu tenke sai membru orgaun sentral minimu tinan lima.
Iha mós estatutu Fretilin artigu 7 ne’ebé fo dalan no garante ema nia direitu de tendensia, maibé estatutu mós fó dalan iha eleisaun direta sei harii organizasun ne'ebe propriu, Komisaun Nasional halo preprasaun no organizasaun sei harii tan komisaun seluk, atu halo rejistu ba kandidatu sira bele aprezenta pakote sira.
"Ba eleisaun mai ne'e, diretu liberdade ida-idak nian ona para atu hili, no depende mós ba kandidatu sira-nia aprezentasaun programa sira-nia politika relativa ba Fretilin nia lala'ok ne'e saida, depois mak militante sira sei diside”, dehan Nakfilak, hafoin abertura ba estabelesimentu ejistensia Organizasaun Rejisténsia Hametin Fretilin (ORHF) iha Bairo Formosa, sábadu (06/03).
Prezidente Organizasaun Rejisténsia Hametin Fretilin (ORHF), Abilio "Mau-soko" deklara, eleisaun ba kargu rua hanesan Prezidente no Sekretáriu Jerál Partidu Fretilin ne'ebe sei realiza iha tinan ne’e, membru ka organizasun hothotu iha partidu bele aprezenta kandidatura atubele komoete, maibé labele sobu fali partidu.
"Iha nasaun demokrátiku ne'e, la taka dalan ba ema ida, ema hothotu iha diretu, no liberdade atu kompete", afirma
Maibé, nia parte seidauk deside atu fó apoiu ba kandidatura ruma, tanba seidauk defini loron fiksu ba eleisaun lideransa partidu rasik.
"Ita seidauk hatene, tanba agora de'it seidauk realiza kongresu Fretilin nian, oinsá ita bele fó apoiu”, deklara Mausoko. (*)