Xefe estadu mos apresia esforsu koletiva husi Organização Popular da Mulher Timor (OPMT) no Comissão de Pesquisa e Elaboração da História da Luta da Mulher Timor.
Prezedente Repúblika hateten, livru ne’e hatudu istória koletiva ema barak nian, la’ós individu ka grupu ida nian, maibé koletiva nian hodi reflete papél feto nu’udar protagonista iha luta libertasaun nasionál.
Prezidente Repúblika hatutan, livru ne’e nu’udar sasin kona-ba partisipasaun feto iha luta libertasaun nasionál no hatudu katak liberdade hetan ho folin aas tebes.
“Tanba ne’e foin sa’e tenke hatene asume no transmite valór no prinsípiu luta libertasaun nasionál,” dehan Prezidente Repúblika iha Palásiu Prezidensiál Nicolau Lobato, sesta (5/3)
Xefe Estadu ne'e haktuir, Livru ho títulu Buibere Hamriik Ukun Rasik An sei lansa husi nia rasik iha loron internasionál ba Feto, 8 marsu 2021, iha Palásiu Prezidensiál Nicolau Lobato, tuku 16.00.
"Sekretária Jerál OPMT, Lourdes Maria Alves Araújo agradese lider nasionál hotu-hotu nia apoiu hodi bele realiza peskiza no prodús obra ida ne’e no husu deskulpa ba atrazu iha prosesu produsaun tanba fatór oinoin," dehan PR iha komunikandu imprensa ne'ebé www.tempotimor.com asesu.
PR informa, Iha agostu 2010, OPMT ho apoia husi lideransa nasionál hotu-hotu hala’o angariasaun fundu ba projetu hakerek livru partisipasaun feto iha luta libertasaun nasionál. Husi osan angariasaun fundu ne’e no apoiu husi Governu, OPMT harii Comissão de Pesquisa e Elaboração da História da Luta da Mulher Timor hodi halibur dadus kona-ba feto nia partisipasaun iha luta hasoru okupasaun Indonézia husi fontes feto no mane liu ema na’in-800 husi munisípiu 13.
"Comissão de Pesquisa e Elaboração da História da Luta da Mulher Timor halo rekrutamentu ba peskizadór no hakerek na’in sira ba produsaun livru Buibere Hamriik Ukun Rasik An".(*)