Tempotimor (Dili)- Governu liu-husi reuniaun Konsellu Ministru extraordinaria desidi taka movimentasaun ema nian ou atividade iha Munisípiu Dili ba Munisípiu sira no ema husi Munisípiu bele mai Dili maibe labele sai husi Dili, durante loron 7 nia laran, tanba ema na'in rua mak komfirmadu ona ba moras Covid-19 iha area tasi-tolu, Aldeia Tera-santa, Suku Madohi, Postu-administrativu Don Aleixo, no Munisípiu Dili.
Ministru Prezidensiá Konsellu Ministru, Fidélis Leti Magalhães, informa, serka sanitária ba Munisípiu Dili durante loron 7, hahu loron 09 to'o 15 Fulan Marsu tinan 2021, atividade hotu iha Dili laran paradu hotu, inklui programa implementasaun Cesta Básika.
"Konsellu Ministru desidi katak, hahu aban (loron tersa 09 Fulan Marsu), sei tama emvigor impozisaun serka sanitária no konfinamentu obrigatoriu ba iha Munisípiu Dili", Dehan Nia hafoin reuniaun Konsellu Ministru extraordinaria iha edifísiu Ministériu Finansas aitarak-laran, Segunda (08/03/21).
Durante loron 7 serka sánitaria ne'e, bandu ema hotu labele sai husi Munisípiu Dili.
"Sidadaun sira sei la autoriza atu hala'o atividade kulturáis, relijioza, no atividade sira hotu durante periodu loron 7 nia laran, no mós la autoriza atu sai husi hela fatin ba fatin públiku sira, ou dezloka ba fatin sira sein nesesidade, anaunser nesesidade hanesan hola ai-han, pulsa eletrisidade, no médikamentu sira", informa
Maibé, atu ba hola nesesidade sira urjenti, tenki la'o ema ida de'it, labele la'o grupu, no bainhira parte seguransa husi tenki justifika razaun.
Nune'e, atividade Igreja no eskola sira mós sei laiha durante loron 7 nia laran.
"Ita konklui katak, atividade sira hotu sei paradu iha loron 7 nia laran", nia dehan
Antes ne'e, iha loron 07 fulan Marsu tinan 2021, Kordenadór Forsa-Tarefa ba Prevensaun no Mitigasaun Surtu Covid-19, Rui Maria de Araújo hatete, kazu pozitivu Covid-19 na'in rua iha ona tasi-tolu, nune'e sei hato'o proposta bá Konsellu Ministru hodi tetu medidas ba situasaun iha rai laran.
"Aban dadeer se laiha nesesidade atu halo movimentu sai lapresiza lai halo movimentu sai, aban SS-SIJK sei hato’o proposta konkreta ba konsellu ministru atu foti desizaun kona-ba medida ne’ebé sei foti ba munisípiu Dili laran tomak", dehan Nia
Kazu konfirmadu Covid-19 ne'ebé dadaun baixa hela iha izolamentu hamutuk na'in 28. (*)
