Prezidente Parlamentu Nasional, Arão Noe de Jesus, kontinua halo viajem ba rai liur ho argumentu katak rezultadu viajen ne'e mak bele hadia lei sira.
"Viajen dalaruma ita hanoin buat sira ne'e ladun importante mas hau hakarak dehan katak viajem barak ba rai liur ne'e nia progresu ba aprovasaun lejislasaun sira", dehan Arão, iha Palásiu Prezidensiál Bairru-Pité, Kuarta (29/5).
Dalaruma haree husi termu jeral ladun hetan, tanba diskusaun ba kontéudu lei sira ne'e iha nivel komisaun no plenária entaun ema barak mak ladun hatene dehan deputadu sira ba ne'e pasiar, mai la halo buat ida, maibé ninia entendimentu ne'e haree kazu ba kazu.
Nia esplika, iha Terseira Lejizlatura viajen ba rai liur nia rezultadu mak lei kona-ba rai, lei poder lokal, lei sira aprova ne'e rezultadu husi deputadu sira nia viajem ba rai liur no lei sira ne'ebé halo alterasaun sira ne'e hotu. Tanba foin lalais halo alterasaun ba lei Komisaun Nasional eleisoens (CNE) nian ne'e tanba komisaun nia viajem ba rai liur hodi adobta modernizasaun mundu nian.
"Timor labele paradu iha fatin deit, tenke buka esperiensia husi nasaun seluk para bele hadi'a ita nia lejizlasaun sira. Tanba dala ruma asesor sira ne'ebé mai ne'e foti fali lei sira ne'ebé iha nasaun seluk uza ona tinan lima ka sanolu no sira soe ona ba lixu mak ita foti mai ita kopi sai hanesan referensia no aprova sai lei", tenik Prezidente PN.
Nia aumenta, deputadu sira ne'e ba halo estudu komparativu iha rai liur hetan katak, lei ne'e ema la uza ona, entaun tenke foti fali estudu sira ne'e para hadia fali lejizlasaun sira ne'e no bele lao hanesan ho Estadu sira iha mundu atu labele atrazadu. Tanba ne'e, estudu komparativu imortante tebes.