Rui dehan, serka sanitária ne'ebé aplika iha Dili bazeia ba rezolusaun governu númeru 12/2021 iha 8 de marsu vale ba loron hitu, nune'e atu aumenta, SS-SIJK sei relata ba governu bazeia ba estatístika kazu.
"Serka Sanitária kuandu to'o momentu ida, SS-SIJK sei rekomenda ba governu tuir dezenvolvimentu kazu ne'ebé ita akompaña," dehan Rui liuhusi konferénsia imprensa iha iha Sentru Konvensaun Dili (CCD), Sesta (12/3).
Rui afirma, serka sanitária ne'ebé aplika iha Dili, la fó fatin ba sidadaun se de'it atu tama no sai husi Dili.
"Hotu-hotu tu’ur hakmatek iha fatin. Autoridade ne’ebé bele autoriza ema nia movimentu maka Brigadeiru Jenerál Aluk, Diretor SIJK. Depois iha rezolusaun governu ne’e mós obriga sidadaun hotu iha sidade Dili, atu halo konfinamentu domisiliáriu jeral. Ida ne’e signifika, hela iha uma, labele sai. Sai deit wainhira presiza tamba moras, hola hahán ka sira ne’ebé halo servisu esensiál," dehan Rui.
Nia mós apelu ba populasaun iha Dili laran tomak, atu nafatin kalma, lalika pániku, halo tuir regra konfinamentu domisiliáriu jeral, fó tempu ba ekipa konjunta saúde buka tuir kontaktu besik sira hotu.(*)