Husi vitima sir ne'e ida kilat musan iha hela nia isin laran, ida liman la funsiona, ida seluk rins ida deit, ida liman tohar no seluk tán ninia hasan liga ho serbru ne'ebé dalaruma monu sai.

"Ho kondisaun sira ne’e ami mai hato’o ba Prezidente Repúblika para oinsa bele tau matan ba sira nia saúde”, dehan Prezidente Movimentu Revolusionáriu ba Karáter iha Future (MRCF) Me. Guillermina Marçal, hafoin hasoru malu ho Prezidente Repúblika, iha Palásiu Prezidensiál, Bairru-Pité, Kinta (30/5).

Me. Guilhermina dehan, durante enkontru ho Prezidente Repúblika hato’o mós oinsa atu haree fila-fali ba aktu membru PNTL nian, maske ida-rua mak halo maibé bele afeta ba instituisaun tomak.

Tuir nia, ba futuru kontinua halo kapasitasaun ba membru polisia atu nune’e bele sai belun diak ba komunidade no bele iha relasaun diak ho PNTL, hodi parte rua ne’e hamutuk harii sosiedade ne’ebé inkluzaun ba pás no estabilidade iha rai laran.

Hataan kona-ba preokupasaun vítima na'in 5 nian, Prezidente Repúblika, Francisco Guterres Lú Olo, sei ko’alia ho Primeiru Ministru no Komandante Jeral PNTL atu bele buka solusaun ba kestaun ne’e.