Diretór Nasionál Empregu Esteriór-SEFOPE, Filomeno Soares hatete, kandidatu traballadór timoroan sira nee ne'e naran tama ona iha sistema.
"Ita-nia traballadór bá Korea ne'e, traballadór regular ne'ebé mak tuir ona teste, depois liu ona, tama iha sistema, aplika ona bá serbísu iha Korea ne'e, ita iha 521 pesoas mak hetan ona kontratu mai husi Korea”, dehan nia iha kna’ar fatin Bekora, kuarta (17/03).
Tanba sistema ne'ebé mak traballadór hirak naran tama ona ne'e, hanaran sistema Spas, atu utiliza hodi fahe informasaun.
"Tama ona iha sistema ami bolu, sistema Spas ne'ebé mak Korrea ho Timor uza atu manda informasaun bá mai ne'e, ida ne'e mak sira-nia kontratu foin tama iha ami-nia sistema ne'e mak 521”, afirma nia.
Tuir planu, surtu Covid-19 laiha karik, traballadór hirak ne'e aranka iha tempu badak, maibé situasaun ne'é risku hela, entaun sei hein ituan.
"Ita hein atu prosesu ne'é, surtu Covid-19 laiha ita bele la'o ona, agora dadauk ita simu hela, maibé ita atu bá halo nusá”, dehan nia.
Ho situasaun ne'e, dadaun parte SEFOPE tenta komúnika hela ho parte relevante sira iha Korea, nune'e bele rezolve Voo regular hodi bele lori traballadór hirak ne'e bá. (*)